Pas një takimi që zgjati më shumë se dy orë në Kuvendin e Kosovës, Kurti tha se diskutimet janë zhvilluar në një atmosferë konstruktive dhe se do të vazhdojnë edhe në ditët në vijim.
“Ende nuk kemi arritur një konkluzion. Jam optimist për rrugën përpara, me shpresën se racionaliteti po mbizotëron. Takimi ka përfunduar, por do të ketë edhe takime të tjera”, deklaroi Kurti.
Ai bëri të ditur se në takim janë trajtuar zhvillimet aktuale politike, dinamika institucionale dhe hapat për konstituimin e institucioneve të dala nga zgjedhjet e 7 qershorit.
“Takimi shkoi në atmosferë konstruktive, ku diskutuam shumë çështje të zhvillimeve politike, të dinamikave institucionale dhe njëkohësisht orarin që na pret përpara konstituimit të institucioneve të dala nga zgjedhjet e 7 qershorit. Ishte takimi i parë. Të gjithë e dimë që pardje u bë certifikimi dhe, përveç kësaj, i kemi edhe katër javë përpara për fillimin e seancës konstituive për zgjedhjen e kryetarit ose kryetares së Kuvendit, Kryesisë së Kuvendit, e më pas edhe të Qeverisë dhe Presidentit”, tha ai.
Diskutime për parime, jo për emra
Kurti theksoi se gjatë takimit nuk është diskutuar për emra konkretë për postin e presidentit, por për parimet dhe konceptet mbi të cilat mund të ndërtohet një marrëveshje politike.
“Kemi diskutuar për të gjitha këto. Por ende nuk kemi ndonjë konkluzion apo marrëveshje që mund ta ndajmë me publikun. Jam optimist për rrugën përpara dhe shpresoj që racionaliteti që ka mbizotëruar në këtë takim të vazhdojë edhe në takimet e ardhshme”, u shpreh ai.
Sipas tij, bisedimet janë përqendruar te konceptet, parimet, afatet dhe funksionet institucionale, me synimin për të ndërtuar një marrëveshje sa më të gjerë politike.
“Diskutojmë koncepte, parime, orare dhe funksione. Është një ndërmarrje e madhe dhe e gjerë që kërkon besim, mirëbesim dhe kohë për t’u realizuar. Do të jemi transparentë ndaj qytetarëve për procesin, por njëkohësisht këto bisedime kanë edhe elemente konfidencialiteti që duhet të respektohen derisa të ketë rezultate konkrete”, deklaroi Kurti.
Synimi është shmangia e zgjedhjeve të reja
Kryeministri në detyrë ritheksoi se objektivi i tij mbetet arritja e një marrëveshjeje politike që do të mundësojë formimin e institucioneve të reja, duke shmangur nevojën për zgjedhje të reja.
“Jam i interesuar për marrëveshje dhe jo që të kemi zgjedhje. Duhet t’i evitojmë zgjedhjet e reja”, tha Kurti.
Ai shtoi se takimi nuk ishte i fokusuar në kandidatura për postin e presidentit, por në krijimin e bazës politike për bashkëpunim institucional.
“Nuk ka qenë takim për emër për president, por për koncepte dhe parime. Gjithashtu kemi diskutuar se si, në mënyrë strategjike, të sigurojmë numrin maksimal të deputetëve kur të vijë çështja e zgjedhjes së presidentit”, përfundoi Kurti.
