Kryeministri në detyrë, Albin Kurti, ka bërë të ditur se Fondi i Kursimeve Pensionale të Kosovës (Trusti) ka regjistruar rezultatin më të lartë investues në një periudhë gjashtëmujore që nga themelimi i tij.
Sipas tij, nga 1 janari deri më 30 qershor 2026, kthimi bruto nga investimet ka arritur në rreth 312 milionë euro.
Kurti ka theksuar se, së bashku me rezultatet e viteve të kaluara, Trusti ka gjeneruar rreth 956 milionë euro kthim bruto nga fillimi i vitit 2023 deri në fund të qershorit 2026.
Sipas të dhënave të publikuara, rezultatet sipas viteve janë:
- 2023: 88 milionë euro
- 2024: 247 milionë euro
- 2025: 309 milionë euro
- Gjashtëmujori i parë 2026: 312 milionë euro
Kurti vlerësoi se këto rezultate përbëjnë një lajm pozitiv për qindra mijëra kontribuues, kursimet pensionale të të cilëve investohen për të garantuar siguri financiare pas pensionimit.
Ai shtoi se këto rezultate dëshmojnë rëndësinë e qeverisjes së mirë, profesionalizmit, integritetit dhe përgjegjësisë institucionale, duke theksuar se institucionet publike arrijnë rezultate më të mira kur udhëhiqen nga profesionistë dhe kur interesi i qytetarëve vihet në plan të parë.
Kryeministri gjithashtu përgëzoi Bordin, menaxhmentin dhe stafin e Trustit për punën e tyre, duke bërë të ditur se vlera totale e Fondit të Kursimeve Pensionale të Kosovës ka arritur në 4 miliardë e 245 milionë euro.
Në fund, ai theksoi se Qeveria do të vazhdojë të mbështesë përmirësimin e kuadrit ligjor, duke respektuar pavarësinë institucionale të Trustit, me synim që kursimet pensionale të qytetarëve të menaxhohen me siguri, transparencë dhe perspektivë afatgjatë.
