Kuvendi Komunal i Skenderajt ka miratuar njëzëri propozimin për deklaratën “Jo në emrin tim”, e cila shpreh kundërshtimin ndaj aktgjykimit të shkallës së parë të Dhomave të Specializuara ndaj ish-krerëve të Ushtrisë Çlirimtare të Kosovës.
Lajmin e ka bërë të ditur Sami Lushtaku, i cili tha se propozimi i tij është mbështetur nga të gjithë anëtarët e Kuvendit Komunal.
Sipas Lushtakut, përmes kësaj deklarate shprehet solidariteti me familjet e ish-krerëve të UÇK-së dhe ritheksohet qëndrimi se lufta e UÇK-së ishte luftë për liri dhe çlirim.
“Faleminderit të gjithë anëtarëve të Kuvendit Komunal të Skenderajt për mbështetjen njëzëri të propozimit tim për miratimin e Deklaratës ‘JO NË EMRIN TIM’”, ka shkruar Lushtaku.
Ai e ka cilësuar votimin unanim si dëshmi të qëndrimit të përbashkët të Kuvendit Komunal dhe qytetarëve të Skenderajt.
“Ky votim i njëzëshëm është një dëshmi e qëndrimit të përbashkët të Kuvendit dhe qytetarëve të Skenderajt: ‘JO NË EMRIN TIM!’”, ka deklaruar Lushtaku.
Në fund, ai ka falënderuar të gjithë anëtarët e Kuvendit Komunal që e mbështetën deklaratën.
