Kuvendi i Kosovës ka nisur seancën e jashtëzakonshme, pasi në fillim të seancës u konstatua se në sallë janë të pranishëm 89 deputetë.
Pas konstatimit të kuorumit, është hapur seanca e jashtëzakonshme, me pikën e parë të rendit të ditës: shqyrtimi në lexim të dytë i Projektligjit për Dhomat e Specializuara.
Kryetari i Komisionit për Legjislacion, Vigan Qorrolli, ka paraqitur punën e komisionit, duke bërë të ditur se projektligji është shqyrtuar dhe miratuar nga komisioni. Ai ka propozuar që Kuvendi ta miratojë projektligjin.
Fillimisht është hedhur në votim amendamenti i parë, i cili është miratuar me 90 vota për.
Më pas, deputetët kanë votuar për Projektligjin për ndryshimin dhe plotësimin e Ligjit për Dhomat e Specializuara.
Projektligji është miratuar në lexim të dytë me 88 vota për.
Pas përfundimit të kësaj pike të rendit të ditës, Kuvendi pritet të vazhdojë me pikën tjetër, atë të zgjedhjes së presidentes së Kosovës.
