Një lajm pozitiv vjen për shumë shqiptarë që jetojnë dhe punojnë në Austri, veçanërisht për ata të angazhuar në sektorët e ndërtimit, pllakave, drurit dhe industrisë kimike. Sipas marrëveshjeve të reja kolektive mes sindikatave dhe punëdhënësve, mijëra punëtorë do të përfitojnë rritje page gjatë vitit 2026.
Rreth 16,500 punonjës në sektorin e ndërtimit do të përfitojnë nga një rritje page prej 3.5%, pas marrëveshjes mes sindikatës GBH dhe punëdhënësve.
Kush përfiton më shumë?
Rritja prek sidomos profilet ku punojnë edhe shumë shqiptarë në Austri, si:
- Muratorë dhe punëtorë ndërtimi
- Shtrues pllakash (keramistarë)
- Fasaderë
- Punues druri dhe mobilierë
- Montues dritaresh dhe dyersh
- Punëtorë në renovime dhe interior
Një punëtor i kualifikuar në ndërtim do të marrë deri në 1,690 euro bruto më shumë në vit, ndërsa punuesit e pllakave rreth 1,550 euro më shumë në vit.
Edhe industria kimike me rritje page
Lajme të mira ka edhe për ata që punojnë në fabrika, industri prodhuese, laboratorë dhe sektorin kimik, ku përfshihen rreth 50,000 punonjës në Austri.
Sipas marrëveshjes së re:
- pagat rriten me 1.8% retroaktivisht nga 1 maji 2026
- maksimumi i rritjes arrin deri në 100 euro më shumë në muaj
- punëtorët marrin edhe 300 euro pagesë të njëhershme ose alternativisht 1 ditë pushim shtesë
Bonus edhe për praktikantët dhe familjet
Marrëveshja parashikon edhe:
- 150 euro bonus për praktikantët me rezultate të shkëlqyera
- 100 euro bonus për rezultate të mira
- 1 javë pushim shtesë me pagesë për prindërit me fëmijë me aftësi të kufizuara
Në një kohë kur kostoja e jetesës, qiraja dhe shpenzimet mujore në Austri vazhdojnë të rriten, kjo rritje page konsiderohet një lehtësim i rëndësishëm për shumë familje shqiptare.
Për bashkëatdhetarët tanë mesazhi është i qartë: nëse punoni në bau, renovim, industri, prodhim ose sektor teknik, kontrolloni kontratën tuaj kolektive — rritja mund të prekë drejtpërdrejt edhe pagën tuaj.
