Kryetari i komunës së Drenasit, Ramiz Lladrovci, ka lëshuar një deklaratë të fortë politike duke paralajmëruar se është i gatshëm të hyjë në zgjedhje të përgjithshme nëse presidentja e vendit shpall datën edhe nesër.
Në një intervistë në emisionin Debat Plus, Lladrovci ka thënë se do të sfidojë drejtuesit aktualë të Partisë Demokratike të Kosovës, nëse, siç u shpreh ai, partia “nuk reflekton”.
“Nëse presidentja vendos për zgjedhje nesër, nesër më keni në zgjedhje. Po, kam me e thy në kurriz. Nëse lidershipi i PDK-së nuk reflekton – jo Partia Demokratike – kam me e thy në kurriz”,
deklaroi Lladrovci gjatë debatit.
Sipas tij, mungesa e përgjegjësisë ndaj qytetarëve të Drenasit e ka shtyrë të mendojë seriozisht për një inicativë të re politike, përmes së cilës synon të garojë në zgjedhje nacionale.
“Unë jam duke punuar me njerëzit më të ndershëm e më të mirë të këtij vendi për t’u ofruar diçka ndryshe qytetarëve,”
tha ai, duke akuzuar lidershipin aktual të PDK-së për, siç u shpreh, “mosdije në rolin opozitar ndaj qeverisë së Albin Kurtit për pesë vite me radhë”.
Deklaratat e Lladrovcit kanë ngjallur reagime brenda opinionit politik, pasi përbëjnë një nga kritikat më të drejtpërdrejta ndaj strukturës aktuale të PDK-së nga brenda partisë.
Analistët vlerësojnë se ky qëndrim mund të sinjalizojë çarje të reja të brendshme brenda partisë më të madhe opozitare në vend, veçanërisht në prag të mundshëm të një cikli të ri zgjedhor.
