Nënkryetari i Lidhja Demokratike e Kosovës, Lutfi Haziri, ka prezantuar pesë kandidatët e Degës së Gjilanit që do të garojnë për deputetë në zgjedhjet parlamentare të 7 qershorit.
Përmes një deklarate publike, Haziri tha se LDK hyn në këtë proces zgjedhor me synimin për “rikthimin e madh” të partisë, duke theksuar bashkimin e strukturave pavarësisht dallimeve të brendshme.
“Jemi bashkuar në dallimet tona për rrugën më të mirë, por me një qëllim të vetëm: rikthimin e madh të LDK-së për Kosovën”, deklaroi ai.
Pesë kandidatët nga Gjilani
Sipas Hazirit, kandidatët e Degës së Gjilanit janë:
- Lutfi Haziri
- Besim Guda
- Gentrit Murseli
- Valentina Bunjaku Rexhepi
- Drenushë Maloku Bejtullahu
Haziri tha se këta kandidatë do të përfaqësojnë interesat e qytetarëve të Gjilanit dhe Anamoravës në Kuvendin e Kosovës.
“Zotohemi se do të jemi zëri juaj më i fuqishëm në Kuvendin e Republikës. Në veçanti, do të jemi gardianë të projekteve zhvillimore të Gjilanit dhe Anamoravës”, u shpreh ai.
Mesazh politik
Në mesazhin e tij, Haziri e përshkroi LDK-në si subjekt që ofron “dashni, dije, përgjegjësi dhe bashkëpunim”, duke theksuar orientimin për stabilitet politik, zhvillim ekonomik dhe mirëqenie sociale.
“LDK, besë e shpresë për Kosovën”, përfundoi ai.
