Mali i Zi po ndryshon regjimin e hyrjes për shtetasit e Rusisë, Bjellorusisë dhe Turqisë. Nga 1 nëntori, shtetasit e këtyre tri vendeve do të kenë nevojë për vizë për të hyrë, kaluar ose qëndruar në territorin malazez.
Qeveria e Malit të Zi ka miratuar Informacionin për nevojën e anulimit të marrëveshjeve ndërkombëtare që rregullojnë regjimin pa viza me Federatën Ruse, Bjellorusinë dhe Turqinë.
Vendimi lidhet me procesin e anëtarësimit të Malit të Zi në Bashkimin Evropian, pasi Podgorica është e detyruar të harmonizojë politikën e saj të vizave me atë të BE-së.
Nga 1 nëntori kërkohet vizë
Qeveria malazeze kishte miratuar më 23 korrik ndryshimet në Rregulloren për regjimin e vizave.
Sipas këtyre ndryshimeve, duke filluar nga 1 nëntori, shtetasit e Rusisë, Bjellorusisë dhe Turqisë do të duhet të pajisen me vizë për:
- hyrje në Mal të Zi;
- kalim tranzit nëpër territorin malazez;
- qëndrim në Mal të Zi.
Ky ndryshim është pjesë e procesit të harmonizimit të legjislacionit malazez me rregullat e BE-së.
Çfarë ndodh me marrëveshjet pa viza?
Meqë regjimi pa viza me këto vende është i përcaktuar edhe përmes marrëveshjeve ndërkombëtare, Qeveria e Malit të Zi ka vendosur të nisë procedurat për anulimin e vlefshmërisë së këtyre marrëveshjeve.
“Duke pasur parasysh se këto çështje rregullohen edhe me marrëveshje ndërkombëtare të lidhura nga Qeveria e Malit të Zi, është e nevojshme të ndërmerren aktivitete me qëllim të anulimit të vlefshmërisë së marrëveshjeve me këto shtete”, thuhet në njoftimin e qeverisë.
Përjashtim për disa pasaporta turke
Në rastin e Turqisë, Mali i Zi planifikon të lidhë një marrëveshje të re për mbajtësit e pasaportave diplomatike, zyrtare dhe speciale.
Kjo do të thotë se regjimi i ri nuk do të jetë i njëjtë për të gjitha kategoritë e pasaportave turke.
Ku do të aplikohen vizat?
Për ta lehtësuar procedurën, aplikimet për viza malazeze pritet të mund të dorëzohen edhe në qendrat e vizave të VFS Global, përveç përfaqësive diplomatike dhe konsullore të Malit të Zi.
Ministria e Punëve të Jashtme e Malit të Zi ka paralajmëruar gjithashtu krijimin e një Sistemi të ri Informacioni për Vizat, të harmonizuar me sistemet e BE-së dhe standardet e sigurisë së zonës Shengen, përfshirë mundësinë e vizave elektronike.
Pse po ndryshon Mali i Zi regjimin e vizave?
Ndryshimi është i lidhur drejtpërdrejt me negociatat për anëtarësimin në BE.
Harmonizimi i politikës së vizave me BE-në është një prej kërkesave të procesit të integrimit evropian dhe lidhet edhe me përpjekjet për të ulur rrezikun e migrimit të parregullt dhe keqpërdorimit të regjimeve pa viza.
Ky ndryshim ka rëndësi të veçantë për Rusinë, pasi shtetasit rusë prej vitesh janë ndër grupet më të mëdha të turistëve dhe vizitorëve të huaj në Mal të Zi.
Mali i Zi ka mbyllur përkohësisht 18 nga 33 kapitujt e negociatave për anëtarësim në BE.
BE-ja ka miratuar ndërkohë nisjen e hartimit të draft-traktatit të anëtarësimit, ndërsa Komisioni Evropian ka miratuar edhe kornizën financiare për Malin e Zi, në vlerë prej gati 3.2 miliardë eurosh, duke marrë si skenar që vendi të bëhet anëtar i plotë i BE-së gjatë vitit 2028. Burim: Radio Evropa e Lirë
