Mark Rutte, Sekretari i Përgjithshëm i NATO, ka konfirmuar se Aleanca planifikon të reduktojë gradualisht numrin e trupave të KFOR në Kosovë, pas vlerësimit se situata e sigurisë në vend është përmirësuar ndjeshëm.
Sipas Rutte, KFOR aktualisht ka rreth 4,700 ushtarë, por NATO synon kthimin në nivelet para vitit 2023, që nënkupton një reduktim në rreth 3,000 deri 3,500 trupa. Ai theksoi se ky vendim lidhet drejtpërdrejt me stabilizimin gradual të gjendjes, sidomos pas tensioneve të larta në veri gjatë dy viteve të fundit.
“Ky është lajm i mirë për Kosovën dhe rajonin”, deklaroi Rutte nga Bruksel, duke shtuar se NATO po rishikon vazhdimisht pozicionimin e forcave për t’iu përshtatur realitetit të ri në terren.
Ky zhvillim lidhet edhe me vendimin e NATO-s të 12 qershorit për të nisur uljen graduale të pranisë ushtarake gjatë vitit të ardhshëm. Kujtojmë se rreth 1,000 trupa shtesë ishin dislokuar në vitin 2023 pas përshkallëzimit të tensioneve në veri të Kosovës.
Edhe komandanti suprem i forcave aleate në Evropë, Alexus G. Grynkewich, ka theksuar se institucionet e sigurisë në Kosovë janë bërë më të afta dhe më të përgatitura për të menaxhuar sfidat lokale.
Aktualisht, KFOR përbëhet nga rreth 4,600 trupa nga 31 shtete, ku kontributin më të madh e japin Italia me 907 ushtarë dhe Shtetet e Bashkuara të Amerikës me 590.
Reduktimi i trupave shihet si një sinjal pozitiv për stabilitetin, por njëkohësisht NATO ka bërë të qartë se mbetet plotësisht e gatshme të reagojë shpejt nëse situata e sigurisë ndryshon.
