Partia Demokratike e Kosovës (PDK) ka vazhduar edhe sot aktivitetin protestues para ndërtesës së Qeverisë së Kosovës, së bashku me studentë të Universitetit të Prishtinës.
Përmes një postimi në rrjetet sociale, PDK-ja tha se protesta do të vazhdojë deri në “rikthimin e rendit kushtetues”.
“Stop uzurpimit të institucioneve. Stop pengmarrjes së shtetit. Stop bllokimit të Kuvendit dhe zërit të qytetarëve!”, thuhet në mesazhin e PDK-së.
Partia opozitare e akuzon pushtetin për bllokim të institucioneve dhe shkelje të rendit kushtetues, ndërsa paralajmëron vazhdimin e presionit politik përmes aktiviteteve para institucioneve.
Në protestën e sotme PDK-së iu bashkuan edhe studentë të Universitetit të Prishtinës, ndërsa mbetet për t’u parë nëse këto protesta do të zgjerohen edhe me pjesëmarrjen e grupeve të tjera shoqërore.
