Policia e Kosovës u ka bërë thirrje qytetarëve të kenë kujdes gjatë shitjes së produkteve përmes platformave online, pasi janë evidentuar raste të mashtrimeve përmes linqeve të rreme që synojnë marrjen e të dhënave të kartelave bankare.
Sipas Policisë, personat e dyshuar kontaktojnë qytetarët që kanë publikuar produkte për shitje dhe paraqiten si blerës të interesuar.
Gjatë komunikimit, ata u dërgojnë shitësve linqe të rreme, përmes të cilave kërkojnë të dhënat e kartelave bankare, me arsyetimin se këto nevojiten për realizimin e pagesës.
Policia u bën thirrje qytetarëve të mos hapin linqe të dyshimta dhe të mos ndajnë të dhënat bankare, përfshirë numrin e kartelës, datën e skadimit, kodin CVV/CVC apo kodet e konfirmimit bankar.
Në rast se dikush i ka dhënë këto të dhëna në faqe të dyshimta, duhet të kontaktojë menjëherë bankën për bllokimin e kartelës dhe ta raportojë rastin në Polici.
“Për të shitur online, nuk keni nevojë të zbuloni të dhënat e kartelës suaj bankare”, thuhet në apelin e Policisë së Kosovës.
