Policia e Kosovës ka njoftuar se qarkullimi me trotinetë elektrikë dhe biçikleta në sheshe është i ndaluar me sinjalizim rrugor.
Sipas Ligjit për Rregullat e Trafikut Rrugor, policia ka ndërmarrë masa, ku janë shqiptuar gjoba ndaj shtatë (7) drejtuesve të trotineteve elektrike, ndërsa trotinetët janë sekuestruar.
Njoftimi i plotë nga Policia:
Prishtinë, 9 korrik 2026 – Drejtoria e Policisë së Kryeqytetit, në kuadër të angazhimeve për garantimin e rendit publik dhe sigurisë së qytetarëve, është duke zbatuar planin e veprimit me fokus te trotinetet elektrikë.
Gjatë patrullimeve dhe monitorimit të vazhdueshëm, zyrtarët policorë fillimisht kanë zhvilluar aktivitete vetëdijësuese, duke informuar personat që qarkullonin me trotinete elektrike dhe biçikleta në sheshe se qarkullimi i tyre në sheshe është i ndaluar me sinjalizim rrugor.
Ndërsa, për kundërvajtësit që nuk kanë respektuar dispozitat ligjore, janë ndërmarrë masa në përputhje me Ligjin për Rregullat e Trafikut Rrugor. Ndaj shtatë (7) drejtuesve të trotineteve elektrike janë shqiptuar gjoba në vlerë prej 150 eurosh. Po ashtu, trotinetët elektrikë u janë sekuestruar.
Kontrollet dhe aktivitetet vetëdijësuese do të vazhdojnë edhe në ditët në vijim, ndërsa ndaj çdo shkelësi do të ndërmerren masat e parapara me ligj.
