Presidenti rus Vladimir Putin do të zhvillojë një vizitë zyrtare në Kinë më 19 dhe 20 maj, ku pritet të takohet me presidentin kinez Xi Jinping, ka njoftuar Kremlini.
Vizita vjen vetëm pak ditë pas qëndrimit të presidentit amerikan Donald Trump në Pekin, duke e kthyer Kinën në qendrën e diplomacisë globale këtë javë.
Sipas deklaratës së Kremlinit, takimi mes dy liderëve do të fokusohet në forcimin e mëtejshëm të partneritetit gjithëpërfshirës dhe bashkëpunimit strategjik mes Moskës dhe Pekinit.
Përveç marrëdhënieve dypalëshe, Putin dhe Xi pritet të diskutojnë edhe për zhvillimet më të rëndësishme ndërkombëtare dhe rajonale, në një kohë tensionesh të larta globale.
Marrëdhëniet mes Rusisë dhe Kinës janë afruar ndjeshëm vitet e fundit, veçanërisht pas nisjes së luftës në Ukrainë. Dy liderët kanë zhvilluar mbi 40 takime ndër vite, ndërsa takimi i fundit u mbajt në Pekin në shtator të vitit të kaluar.
Në shkurt të vitit 2022, vetëm pak javë para pushtimit rus të Ukrainës, Moska dhe Pekini shpallën partneritetin e tyre strategjik “pa kufij”, një marrëveshje që ka ngritur shqetësime në Perëndim për afrimin e dy fuqive globale.
Vizita e Putin në Kinë shihet si një sinjal i qartë i konsolidimit të boshtit Moskë-Pekin, në një moment kur balancat gjeopolitike po ndryshojnë me shpejtësi.
