Qendra e Studentëve në Prishtinë ka shpallur konkursin për pranimin e studentëve në konvikte dhe për shfrytëzimin e mensës së studentëve për vitin akademik 2026/2027.
Sipas njoftimit, aplikimi do të bëhet online, ndërsa konkursi do të jetë i hapur deri më 18 shtator 2026, në orën 16:00.
Konkursi
Qendra e Studentëve në Prishtinë, më 14 shtator 2026, ka shpallur konkursin për pranimin e studentëve në konvikte dhe për ushqim në mensën e studentëve për vitin akademik 2026/2027.
Aplikimi bëhet përmes sistemit online. Linku për aplikim është i publikuar në uebfaqen zyrtare të Qendrës së Studentëve dhe në profilin zyrtar në Facebook, ndërsa udhëzuesi për aplikim gjendet në sistem.
Për konviktet dhe mensën e Qendrës së Studentëve kanë të drejtë të aplikojnë të gjithë studentët e rregullt në studime themelore, vendbanimi i të cilëve është 25 kilometra ose më larg nga Prishtina.
Kriteret për pranim dhe pikët
- Studentët nga Fakulteti i Mjekësisë, Fakulteti Teknik dhe Fakulteti i Shkencave Matematike-Natyrore, me notë mesatare 9.00 dhe me largësi prej 25 kilometrash e më shumë nga Prishtina, pranohen në konvikte pavarësisht totalit të pikëve që fitojnë.
- Studentët nga fakultetet e tjera, me notë mesatare 9.5 dhe me largësi prej 25 kilometrash e më shumë nga Prishtina, pranohen në konvikte pavarësisht numrit të pikëve të fituara.
- Për notën mesatare, studentët fitojnë, varësisht nga mesatarja, 5–15 pikë.
- Për largësinë e vendbanimit nga Komuna e Prishtinës, studentët fitojnë 1–10 pikë.
- Studentët që janë jashtë territorit të Republikës së Kosovës për largësinë marrin 15 pikë.
Pikët shtesë për studentët me status të veçantë
Studentët me status të veçantë përfitojnë pikë shtesë sipas kategorive:
- Student (fëmijë) i dëshmorit – 10 pikë
- Student (fëmijë) i prindit invalid të luftës – 5 pikë
- Student, prindi i të cilit është veteran i luftës – 3 pikë
- Student, prindi i të cilit është martir i luftës – 4 pikë
- Student me aftësi të kufizuara – 6 pikë
- Student pa të dy prindërit – 5 pikë
- Student i të burgosurit politik – 4 pikë
- Student me asistencë sociale – 4 pikë
- Dy ose më shumë studentë nga një familje që aplikojnë në QS – 3 pikë
Të gjithë studentët e këtyre kategorive që përfitojnë pikë shtesë duhet, përmes sistemit online, të ngarkojnë dokumentacionin e kërkuar, përkatësisht certifikatën nga ministria përkatëse.
Në pamundësi të sigurimit të dokumenteve të kërkuara, për kategoritë përkatëse mund të përdoren certifikatat ose vërtetimet nga:
- Shoqata e të Burgosurve Politikë, zyra qendrore në Prishtinë;
- Shoqata e Personave me Aftësi të Kufizuara – HANDIKOS, zyra qendrore në Prishtinë;
- Shoqata e Familjeve të Dëshmorëve – selia qendrore në Prishtinë;
- Për studentët pa të dy prindërit, dëshmia ose certifikata mbi vdekjen e prindërve nga Kuvendi Komunal.
Për studentin, prindi i të cilit është martir i luftës, kërkohet vendimi i MPMS-së dhe certifikata e bashkësisë familjare.
Studentët, prindërit e të cilëve janë veteranë të luftës dhe marrin pagë nga Buxheti i Republikës së Kosovës, duhet të ngarkojnë certifikatën e prindit të lëshuar nga Qeveria e Republikës së Kosovës.
Ndërkaq, studentët, prindërit e të cilëve janë veteranë, por nuk marrin pagë nga Buxheti i Republikës së Kosovës, nuk kanë nevojë të ngarkojnë certifikatën e prindit veteran, pasi pikët u llogariten nga vetë sistemi, bazuar në të dhënat e MPMS-së.
Sqarime për aplikimin
Qendra e Studentëve njofton se pikët e fituara nga nota mesatare, largësia, statusi i studentit me prind invalid të luftës dhe asistenca sociale llogariten automatikisht nga sistemi online. Për këtë arsye, nuk është e nevojshme që këto dokumente të ngarkohen gjatë aplikimit.
Në kategorinë “Dy ose më shumë studentë nga një familje”, aplikuesi për vendosje në QS, gjatë aplikimit, duhet të shënojë numrin e letërnjoftimit të aplikantit të parë në hapësirën e paraparë për këtë kategori.
Për studentët nga radhët e komuniteteve jo shumicë vlen lista e gjeneruar nga sistemi i Universitetit të Prishtinës.
Afatet e konkursit
Konkursi mbetet i hapur deri më 18 shtator 2026, në orën 16:00.
Studentët që kanë shkelur rregulloret në fuqi në Qendrën e Studentëve nuk do të pranohen në konvikte.
Në konvikte do të pranohen studentët me numrin më të madh të pikëve të fituara.
Publikimi i rezultateve: 25 shtator 2026, në tabelat e konvikteve dhe në faqet zyrtare të Qendrës së Studentëve.
Afati për ushtrimin e ankesave online: 28–29 shtator 2026.
Publikimi i rezultateve të ankesave: 1 tetor 2026.
Aplikimi online
Studentët mund të aplikojnë përmes sistemit online të Qendrës së Studentëve.
