Qeveria e Kosovës ka miratuar pakon e re mbështetëse “Inflacioni 2.0”, e cila synon të ndihmojë qytetarët për përballimin e rritjes së kostos së jetesës dhe ndikimit të inflacionit.
Gjatë mbledhjes së Qeverisë, kryeministri në detyrë i Kosovës, Albin Kurti, bëri të ditur se pakoja përfshin mbështetje financiare për disa kategori të qytetarëve.
“Sot kam kënaqësinë që t’ju informoj për pakon për përballjen me inflacionin 2.0. Mbështetje 100 euro për pensionistët, mbështetje prej 100 euro për punëtorët e sektorit jo-publik, 100 euro mbështetje për fëmijët dhe 100 euro për studentët aktivë”, deklaroi Kurti.
Sipas tij, për pensionistët dhe fëmijët përfitimi do të realizohet automatikisht, pa pasur nevojë për procedura shtesë aplikimi.
Ndërkaq, punëtorët e sektorit privat dhe studentët aktivë do të duhet të aplikojnë për të përfituar nga kjo skemë mbështetëse.
Qeveria nuk ka dhënë ende detaje shtesë mbi afatet e aplikimit apo mënyrën e shpërndarjes së mjeteve për kategoritë që kërkojnë aplikim.
