Kryeministri në detyrë i Kosovës, Albin Kurti, ka bërë të ditur se Qeveria ka marrë vendim për rritjen e shtesave për gratë lehona, duke njoftuar se nga 1 qershori i këtij viti përfitimet mujore do të arrijnë në 500 euro.
Gjatë mbledhjes së Qeverisë, Kurti tha se mbështetja për lehonat është rritur gradualisht gjatë mandatit të qeverisë së tij, duke theksuar se më parë nuk kishte pagesa të tilla.
“Derisa me qeverisjet e kaluara shtesat për lehona ishin zero, për herë të parë e nisëm duke paguar nga 170 euro për gjashtë muaj për lehonat e papuna dhe tre muaj për të punësuarat. Shtesat i nisëm aq sa ishte paga minimale, kurse në maj të vitit të kaluar i rritëm në 325 euro”, deklaroi Kurti.
Ai shtoi se me rritjen e pagës minimale në vend, qeveria ka vendosur ta rrisë edhe mbështetjen për lehonat.
“Sivjet pagën minimale e rritëm përsëri. Nga 1 korriku ajo bëhet 500 euro. Edhe në këtë maj po i rrisim shtesat për lehona, nga 325 në 500 euro në muaj”, u shpreh ai.
Sipas njoftimit, ndryshimi pritet të hyjë në fuqi nga 1 qershori dhe paraqet rritjen më të fundit të mbështetjes financiare për gratë pas lindjes.
