Qeveria në detyrë e Republikës së Kosovës ka mbajtur një mbledhje elektronike, në të cilën ka miratuar disa vendime me ndikim në financat publike, kulturë dhe mbështetjen ekonomike.
Në mbledhje është miratuar Raporti Gjashtëmujor Financiar i Buxhetit të Republikës së Kosovës për vitin 2026, i cili paraqet ecurinë e të hyrave dhe shpenzimeve buxhetore gjatë gjashtëmujorit të parë të vitit.
Sipas raportit:
- Të hyrat buxhetore arritën në 1 miliard e 816.52 milionë euro;
- Shpenzimet buxhetore u realizuan në vlerë prej 1 miliard e 777.50 milionë euro.
Qeveria ka vendosur gjithashtu të ndajë 21 mijë euro për realizimin e shfaqjes teatrore “Taverna Mirësia – Mario, Bella, Anastasia”, me regji të Mario Banushit.
Po ashtu, janë ndarë 1.4 milionë euro për zbatimin e Masës 3.8 të Pakos së Ringjalljes Ekonomike, me qëllim mbështetjen e masave ekonomike të parashikuara nga qeveria.
Në mbledhje është miratuar edhe ndryshimi dhe plotësimi i Vendimit të Qeverisë Nr. 08/20, të datës 22 maj 2026, që ka të bëjë me zbatimin e Pakos për Përballje me Inflacionin 2.0.
Vendimet e miratuara synojnë vazhdimin e zbatimit të politikave fiskale dhe ekonomike, si dhe mbështetjen e sektorëve prioritarë përmes financimit buxhetor.