Kryeministri Edi Rama ka reaguar ndaj protestave të mbajtura në Tiranë, duke kritikuar pjesëmarrjen e shqiptarëve nga Kosova dhe Maqedonia e Veriut në tubimet kundër qeverisë shqiptare.
Në një reagim të gjatë në rrjetet sociale, Rama thekson se shqiptarët e Maqedonisë së Veriut nuk mund të konsiderohen diasporë, por janë popull shtetformues në shtetin ku jetojnë, ndërsa shqiptarët e Kosovës kanë shtetin e tyre të pavarur.
Ai pyet se kush përfiton, sipas tij, nga përfshirja e tyre në protesta në Tiranë, duke e cilësuar këtë si një deformim të realitetit politik dhe kombëtar.
Rama pretendon se pas këtyre zhvillimeve qëndrojnë sponsorë që, sipas tij, po investojnë për “dëm kombëtar dhe ndërkombëtar të imazhit të shqiptarëve”.
Një pjesë e reagimit të tij lidhet edhe me përdorimin e flamurit të UÇK-së në protesta, të cilin ai e cilëson si “përdhosje”, duke e lidhur me thirrje për rrëzimin e qeverisë në Tiranë.
“Brengoset apo gëzohet kush i do shqiptarët në sherr e në rrëmujë…”, shkruan Rama, duke shtuar se protestuesit po përdoren si instrument politik.
Ai gjithashtu distancohet nga çdo lidhje e drejtpërdrejtë me kryeministrin e Kosovës, Albin Kurti, duke theksuar se nuk e konsideron atë përgjegjës për, siç i quan ai, “sallahanet e Vetëvendosjes”.
Në fund të reagimit, Rama përdor edhe një citim të Gjergj Fishtës, duke e mbyllur deklaratën me tone të ashpra politike dhe kritika ndaj organizatorëve të protestës.
