Gjermania po përgatitet të zbatojë reformën më të thellë të sistemit të pensioneve në dekada. Qeveria e kancelarit Friedrich Merz ka miratuar parimet bazë të reformës, e cila pritet të kalojë në Bundestag brenda këtij viti dhe të ndryshojë mënyrën se si financohen pensionet në vend.
Reforma vjen si përgjigje ndaj plakjes së popullsisë, mungesës së fuqisë punëtore dhe sfidave ekonomike, ndërsa synon ta bëjë sistemin e pensioneve më të qëndrueshëm në afatgjatë.
Rritet gradualisht mosha e pensionit
Një nga ndryshimet kryesore është vazhdimi i rritjes graduale të moshës së daljes në pension.
Mosha ligjore do të arrijë në 67 vjeç deri në vitin 2031, ndërsa më pas do të lidhet me rritjen e jetëgjatësisë mesatare të popullsisë. Sipas planit, rritja do të jetë shumë e ngadaltë dhe një moshë pensionimi prej 70 vjeç nuk pritet të zbatohet para vitit 2092.
Autoritetet gjermane kanë bërë të ditur se reforma nuk parashikon ulje të pensioneve ekzistuese.
Pension shtesë përmes investimeve në tregun e kapitalit
Risia më e madhe e reformës është krijimi i një fondi shtetëror të aksioneve, ku çdo punonjës do të kontribuojë një pjesë të pagës së tij.
Fillimisht do të kontribuohet 0.5 për qind e pagës bruto, ndërsa deri në vitin 2031 kjo normë do të rritet gradualisht në 2 për qind. Kontributi do të ndahet përgjysmë mes punëmarrësit dhe punëdhënësit.
Fondet do të investohen në tregjet financiare, duke krijuar një burim shtesë të ardhurash për pensionistët. Sipas përllogaritjeve, 20 vite kontribute mund të sjellin rreth 150 euro shtesë në muaj, ndërsa 45 vite kontribute mund të sigurojnë mbi 770 euro shtesë krahas pensionit ligjor.
Më shumë kontribuues në skemën e pensioneve
Reforma zgjeron edhe bazën e kontribuuesve në sistem.
Për herë të parë, në skemën e pensioneve do të përfshihen edhe të vetëpunësuarit dhe deputetët, ndërsa po shqyrtohet edhe përfshirja e nëpunësve civilë. Gjithashtu, puna me pagesë minimale (minijob) do të lidhet më ngushtë me sistemin e pensioneve.
Qeveria synon që barra financiare të shpërndahet mbi një numër më të madh kontribuuesish, duke garantuar stabilitet afatgjatë të sistemit.
Çfarë do të thotë reforma për emigrantët?
Emigrantët konsiderohen një pjesë kyçe e fuqisë punëtore në Gjermani. Aktualisht, rreth një në pesë punonjës në vend ka shtetësi të huaj.
Reforma u jep mundësi edhe emigrantëve, përfshirë sipërmarrësit, të përfitojnë nga fondi i ri i pensioneve. Megjithatë, përfitimet do të varen nga kohëzgjatja e kontributeve.
Ata që kanë ardhur më vonë në Gjermani ose kanë pasur ndërprerje në pagesën e kontributeve pritet të përfitojnë më pak, ndërsa ata që kontribuojnë rregullisht për shumë vite do të kenë përfitime më të larta.
Një model i ri për ekonominë gjermane
Përmes kësaj reforme, Gjermania synon të largohet nga modeli tradicional i kursimeve dhe të ndjekë shembullin e vendeve si Suedia, Danimarka dhe Holanda, ku një pjesë e pensioneve financohet përmes investimeve në tregjet e kapitalit.
Sipas vlerësimeve, fondi i ri shtetëror mund të investojë rreth 30 miliardë euro në vit në bursë, duke forcuar jo vetëm sistemin e pensioneve, por edhe tregun financiar evropian.
Reforma shihet si një nga projektet më ambicioze sociale dhe ekonomike të viteve të fundit në Gjermani dhe pritet të ketë ndikim të rëndësishëm si për qytetarët gjermanë, ashtu edhe për qindra mijëra emigrantë që jetojnë dhe punojnë në vend.
