Mijëra shqiptarë që jetojnë, punojnë ose kanë vite kontributi në Austri pritet të preken nga ndryshimet e reja në sistemin e pensioneve, pasi nga viti 2027 parashihet rritje e pensioneve mujore.
Sipas përllogaritjeve të publikuara nga Finanz.at, rritja nuk do të jetë e njëjtë për të gjithë pensionistët, por do të përcaktohet sipas nivelit të pensionit aktual. Sistemi austriak i pensioneve parashikon indeksim vjetor të përfitimeve, i lidhur me zhvillimin e inflacionit.
Pensionet më të ulëta do të kenë rritjen më të madhe përqindore. Për pensionet deri në 1,308 euro bruto në muaj, rritja e parashikuar është 3.3 për qind, ndërsa pensionet deri në 6,930 euro bruto në muaj pritet të rriten me rreth 2.95 për qind. Për pensionet më të larta parashihet një shtesë fikse.
Sa do të përfitojnë pensionistët shqiptarë në Austri?
Për shembull, një person që aktualisht merr:
- 1,300 euro pension bruto, nga viti 2027 mund të marrë rreth 1,342.90 euro (+42.90 euro);
- 1,500 euro pension bruto, mund të arrijë rreth 1,544.25 euro (+44.25 euro);
- 2,000 euro pension bruto, mund të rritet në rreth 2,059 euro (+59 euro);
- 3,500 euro pension bruto, mund të arrijë rreth 3,603.25 euro (+103.25 euro).
Për komunitetin shqiptar në Austri, kjo rritje prek veçanërisht ata që kanë punuar për vite në sektorë si ndërtimtaria, gastronomia, industria, transporti dhe shërbimet, duke krijuar të drejtën për pension përmes kontributeve të paguara në sistemin austriak.
Megjithatë, shuma përfundimtare që pensionistët do të marrin në dorë (neto) ende nuk është përcaktuar plotësisht, pasi priten ndryshime të mundshme në lehtësimet tatimore dhe kontributet sociale për vitin 2027.
Austria është një nga vendet evropiane ku jeton një komunitet i madh shqiptarësh, ndërsa shumë prej tyre tashmë kanë kaluar në pension ose po i afrohen moshës së pensionimit pas dekadave pune në këtë shtet.
