Vlora Çitaku, ka reaguar ndaj zhvillimeve të fundit në marrëdhëniet ndërkombëtare, duke kritikuar qeverisjen aktuale për, siç thotë ajo, përkeqësimin e raporteve me aleatët strategjikë.
Çitaku ka deklaruar se përderisa Kosova prej gjashtë vitesh vazhdon të jetë nën masa ndëshkuese dhe me marrëdhënie të dëmtuara me partnerët ndërkombëtarë, Serbia po avancon bashkëpunimin me Shtetet e Bashkuara të Amerikës.
Sipas saj, marrëveshja e re për Dialogun Strategjik SHBA–Serbi përfshin fusha të rëndësishme për të ardhmen, si inteligjenca artificiale, energjia, gazi i lëngshëm amerikan (LNG) dhe bashkëpunimi në kërkimet hapësinore.
“Përderisa tash e gjashtë vjet Kosova vazhdon të jetë e izoluar, nën masa ndëshkuese dhe me marrëdhënie të lënduara me aleatët tanë strategjikë, Serbia po e thellon bashkëpunimin me Shtetet e Bashkuara të Amerikës”, ka shkruar Çitaku.
Ajo ka kritikuar gjithashtu qasjen e Qeverisë së Kosovës ndaj partnerëve ndërkombëtarë, duke thënë se vendi ka zëvendësuar, sipas saj, diplomacinë me propagandë dhe partneritetin me konfrontim.
“Dikur Kosova ishte në qendër të vëmendjes së botës demokratike. Sot, për fat të keq, po rrëshqet në periferi të interesimit të qendrave vendimmarrëse ndërkombëtare”, ka theksuar Çitaku.
Ajo ka bërë thirrje për një politikë të jashtme të bazuar në aleanca, besueshmëri dhe koordinim me partnerët strategjikë.
“E ardhmja e Kosovës ndërtohet me aleanca të forta, me besueshmëri dhe me koordinim me partnerët tanë strategjikë, jo me vetëkënaqësi e konfrontim”, ka shkruar Çitaku, duke shtuar se pasojat e një politike të tillë, sipas saj, nuk i bart vetëm një qeveri, por qytetarët dhe e ardhmja e vendit.
