Në kulmin e tensioneve me Perëndimin, Rusia ka testuar me sukses raketën e re me energji bërthamore 9M730 “Burevestnik”, e cila sipas presidentit Vladimir Putin, është “e pamposhtur” dhe “nuk ka të barabartë në botë”.
Testimi u krye më 21 tetor 2025, ku raketa përshkoi 14,000 kilometra dhe qëndroi në fluturim për rreth 15 orë, sipas raportit të Shefit të Shtabit të Përgjithshëm të Forcave të Armatosura Ruse, Valery Gerasimov, drejtuar presidentit Putin.
Raketa, e njohur nga NATO me nofkën SSC-X-9 “Skyfall”, përshkruhet si një armë me rreze pothuajse të pakufizuar veprimi dhe me një trajektore fluturimi të paparashikueshme, gjë që e bën të vështirë për t’u interceptuar nga sistemet aktuale të mbrojtjes ajrore.
Putin, gjatë një vizite në Postën e Komandës së Forcave të Përbashkëta, e cilësoi Burevestnikun si një “produkt unik” dhe një dëshmi të avancimit teknologjik rus në fushën e armëve strategjike.
“Ky është një produkt ndryshe nga çdo tjetër në botë. Kur njoftuam për zhvillimin e kësaj arme, edhe specialistë të kualifikuar më thanë se një projekt i tillë ishte pothuajse i paarritshëm. Sot, Rusia e ka arritur,” deklaroi Putin, duke nënvizuar se raketa është provë e fuqisë teknologjike dhe ushtarake të vendit.
Ky testim vjen në një moment delikat, teksa Moskë dhe Uashington mbeten në tension për çështjen e luftës në Ukrainë dhe mungesën e një marrëveshjeje paqeje.
Raketa Burevestnik është parë si një pjesë kyçe e doktrinës strategjike të Rusisë për të balancuar avantazhet e NATO-s dhe për të demonstruar aftësinë e saj për goditje bërthamore me rreze të gjatë veprimi.
Ekspertët perëndimorë paralajmërojnë se kjo teknologji rrit ndjeshëm rrezikun e një gare të re armatimesh bërthamore, ndërsa Kremlini e portretizon atë si një garanci për sigurinë kombëtare dhe baraspeshën globale të fuqisë.
Rusia po dërgon një mesazh të qartë strategjik — që aftësitë e saj bërthamore po hyjnë në një epokë të re, ku raketat si “Burevestnik” shërbejnë jo vetëm si armë, por si simbol i fuqisë dhe pavarësisë teknologjike së saj përballë Perëndimit.
