Përplasja ushtarake mes Shteteve të Bashkuara dhe Iranit po hyn në një fazë edhe më të rrezikshme, ndërsa sulmet amerikane ndaj objektivave iraniane kanë vazhduar për natën e shtatë radhazi. Situata po përqendrohet gjithnjë e më shumë rreth Ngushticës së Hormuzit, një nga korridoret më strategjike për transportin global të naftës.
Sipas mediave iraniane, sulmet e fundit amerikane goditën objektiva në provincën Hormozgan, në jug të Iranit, ku raportohet se tre persona kanë humbur jetën dhe tetë të tjerë janë plagosur. Shpërthime janë raportuar gjithashtu në qytetin Sirik dhe në ishullin strategjik të Qeshm.
Komanda Qendrore e SHBA-së (CENTCOM) deklaroi se operacionet kanë për synim dobësimin e kapaciteteve ushtarake të Iranit dhe pengimin e aftësisë së tij për të kryer sulme në rajon.
Në përgjigje, Garda Revolucionare Islamike e Iranit njoftoi se ka kryer sulme me raketa balistike dhe dronë ndaj objektivave ushtarake amerikane në Bahrejn, duke pretenduar se janë goditur depo ushtarake dhe një qendër inteligjence e përdorur nga SHBA-ja. Pas sulmeve, autoritetet në Bahrejn aktivizuan sirenat e mbrojtjes ajrore dhe u bënë thirrje qytetarëve të strehohen.
Mediat shtetërore iraniane raportuan gjithashtu për sulme ndaj bazave amerikane në Kuvajt dhe Jordani. Sipas Teheranit, objektivat përfshinin bazat ajrore Al-Udeid, Ali Al Salem dhe Al-Azraq.
Irani pretendon gjithashtu se ka rrëzuar një dron amerikan në rajonin e Bushehrit, megjithatë ky pretendim nuk është konfirmuar nga autoritetet amerikane.
Ndërkohë, vëmendja ndërkombëtare mbetet e fokusuar te zhvillimet në Ngushticën e Hormuzit. Garda Revolucionare tha se dy anije cisternë shpërthyen dhe u përfshinë nga flakët pasi, sipas saj, hynë në një korridor detar të minuara si pasojë e “udhëzimeve mashtruese” të forcave amerikane. SHBA-ja e ka mohuar kategorikisht këtë pretendim, duke deklaruar se nuk ka pasur një incident të tillë dhe se forcat amerikane nuk kanë qenë të përfshira.
Autoritetet iraniane njoftuan gjithashtu sekuestrimin e katër anijeve cisternë, duke pretenduar se ato po lëviznin nëpër Ngushticën e Hormuzit me mbështetje amerikane. Deri tani nuk janë bërë publike identitetet e anijeve apo ekuipazheve dhe pretendimet nuk janë verifikuar në mënyrë të pavarur.
Përshkallëzimi i konfliktit ka rritur ndjeshëm shqetësimet e komunitetit ndërkombëtar, pasi çdo incident në Ngushticën e Hormuzit mund të ndikojë drejtpërdrejt në furnizimin global me energji dhe në sigurinë e transportit detar.
