Shtetet e Bashkuara të Amerikës kanë njoftuar se Shqipëria ka ratifikuar dhe nënshkruar një marrëveshje kredie në vlerë prej 302 milionë dollarësh, në kuadër të programit “Foreign Military Financing” (FMF), i cili synon të mbështesë modernizimin dhe forcimin e kapaciteteve të Forcave të Armatosura shqiptare.
Marrëveshja përfaqëson një hap të rëndësishëm në thellimin e bashkëpunimit të sigurisë dhe mbrojtjes mes Shqipërisë dhe Shteteve të Bashkuara, duke mundësuar investime në pajisje, teknologji dhe kapacitete të reja ushtarake.
Programi FMF është një nga mekanizmat kryesorë të Shteteve të Bashkuara për mbështetjen e vendeve aleate dhe partnere në përmirësimin e aftësive të tyre mbrojtëse, me synim rritjen e ndërveprueshmërisë brenda strukturave të NATO-s dhe forcimin e sigurisë rajonale.
Marrëveshja e re financiare pritet të kontribuojë në procesin e transformimit të Forcave të Armatosura të Shqipërisë, duke i ndihmuar ato në përmbushjen e angazhimeve të marra si vend anëtar i Aleancës së Atlantikut të Veriut.