Shtetet e Bashkuara kanë vendosur të zgjasin edhe për 30 ditë pezullimin e përkohshëm të sanksioneve ndaj eksporteve të naftës ruse, një vendim që ka shkaktuar habi te aleatët evropianë dhe shqetësim në Kiev.
Vendimi u bë i ditur nga Sekretari amerikan i Thesarit, Scott Bessent, gjatë takimit të ministrave të financave të vendeve të G7 në Paris, ku sipas raportimeve, SHBA konfirmoi se masa do të mbetet në fuqi deri në mesin e muajit qershor.
Ky hap konsiderohet si një lehtësim indirekt për blerësit kryesorë të naftës ruse, si Kina dhe India, në një kohë kur tregjet globale po përballen me mungesë furnizimi dhe presion të lartë mbi çmimet e energjisë.
Në një reagim publik, Bessent tha se zgjatja e licencës synon të stabilizojë tregun global të naftës.
“Kjo do të ndihmojë në stabilizimin e tregut fizik të naftës bruto dhe do të sigurojë që furnizimet të arrijnë në vendet më të prekshme nga kriza energjetike”, deklaroi ai.
Pezullimi fillestar i sanksioneve ishte vendosur pas përshkallëzimit të tensioneve në Lindjen e Mesme dhe luftës me Iranin, e cila shkaktoi rritje të menjëhershme të çmimeve të naftës dhe inflacionit global.
Megjithatë, ky vendim shihet si goditje për Ukrainën dhe Komisionin Evropian, të cilët kishin kërkuar rikthimin e sanksioneve për të rritur presionin financiar ndaj Rusisë dhe për të dobësuar kapacitetin e Moskës për të financuar luftën.
Raportohet se vendimi i Uashingtonit ka ardhur si surprizë për partnerët evropianë, pasi më herët ishte sinjalizuar se përjashtimi do të përfundonte më 16 maj.
Në takimin e Parisit, diskutimet u fokusuan kryesisht në ndikimin ekonomik të krizës në Lindjen e Mesme, ndërsa kreu i Agjencisë Ndërkombëtare të Energjisë, Fatih Birol, paralajmëroi se rezervat tregtare të naftës po pakësohen me shpejtësi.
Zhvillimi i fundit tregon se administrata amerikane po përpiqet të balancojë presionin ndaj Rusisë me nevojën për të shmangur një tjetër tronditje globale të çmimeve të energjisë.