Kosova do të përfshihet sërish nga mot i paqëndrueshëm gjatë ditës së martë, me shtim të vranësirave dhe reshje lokale shiu në disa rajone të vendit.
Sipas parashikimeve meteorologjike, reshjet pritet të jenë më të theksuara në jug dhe perëndim të Kosovës, ndërsa shi lokal mund të ketë edhe në zonat qendrore. Në pjesën veriore të vendit, reshjet parashihen të jenë më të pakta dhe kryesisht simbolike.
Temperaturat do të mbeten relativisht të buta për këtë periudhë, me minimalet që do të zbresin deri në 7 gradë Celsius, ndërsa maksimalet do të arrijnë deri në 20 gradë Celsius.
Qytetarëve u rekomandohet të kenë kujdes gjatë lëvizjes, sidomos në zonat ku reshjet mund të ndikojnë në qarkullimin rrugor.
