Shqipëria ka dënuar ashpër sulmet e fundit ruse ndaj Ukrainës, pasi një prej goditjeve ka prekur kompleksin rezidencial ku banon ambasadori shqiptar në Kiev.
Lajmi u bë i ditur nga ministri i Evropës dhe Punëve të Jashtme të Shqipërisë, Ferit Hoxha, i cili e cilësoi incidentin si një zhvillim të rëndë dhe të papranueshëm.
Në reagimin e tij publik, Hoxha tha se goditja ka vënë në rrezik serioz jetën e ambasadorit shqiptar, duke e konsideruar sulmin një tjetër dëshmi të pasojave të luftës në Ukrainë.
“Kjo është e papranueshme”, deklaroi ai, duke shtuar se shënjestrimi i zonave civile dhe rrezikimi i personelit diplomatik përbëjnë një përshkallëzim serioz të situatës.
Sipas ministrit shqiptar, sulmet e vazhdueshme ndaj infrastrukturës civile – përfshirë shkolla, spitale, sisteme energjetike dhe zona banimi – kanë shkaktuar pasoja të mëdha humanitare gjatë viteve të konfliktit.
Ai theksoi se Shqipëria i bën thirrje Rusisë të ndërpresë menjëherë sulmet, të respektojë të drejtën ndërkombëtare dhe të rikthehet në procesin e negociatave.
Ndërkohë, Hoxha bëri të ditur se ambasadori i Federatës Ruse në Shqipëri është thirrur në Ministrinë e Jashtme për të dhënë shpjegime lidhur me incidentin.
Shqipëria ritheksoi gjithashtu mbështetjen e saj për Ukrainën, duke deklaruar se do të vazhdojë të qëndrojë pranë sovranitetit dhe integritetit territorial të vendit.
