Shqipëria është sot mikpritëse e Ministerialit të Procesit të Bashkëpunimit në Evropën Juglindore (SEECP), duke finalizuar presidencën njëvjeçare të këtij forumi rajonal nën moton “Formësojmë të ardhmen tonë europiane”.
Eventi i nivelit të lartë mbahet në kryeqytetin shqiptar dhe do të hapet nga Presidenti i Republikës, Bajram Begaj, në cilësinë e Kryetarit në detyrë të Samitit të SEECP-së. Tema qendrore e këtij sesioni është “Nxitja e Stabilitetit dhe Prosperitetit përmes Bashkëpunimit Rajonal dhe Integrimit në BE”, duke reflektuar përkushtimin e vendeve pjesëmarrëse për një të ardhme të përbashkët europiane.
Në samit marrin pjesë liderë dhe përfaqësues të lartë nga 13 vendet e Evropës Juglindore, ndërsa gjatë punimeve pritet të theksohet rëndësia e bashkëpunimit rajonal si një shtyllë e fortë drejt anëtarësimit të plotë në Bashkimin Evropian dhe strukturat euroatlantike.
Kryeministri Edi Rama dhe ministri për Evropën dhe Punët e Jashtme, Igli Hasani, kanë theksuar angazhimin e palëkundur të Shqipërisë për të çuar përpara procesin e integrimit evropian të të gjithë rajonit. “Shqipëria, sërish në qendër të diplomacisë ndërkombëtare… Vendi ynë është i angazhuar plotësisht për të nxitur përparimin e vendeve të rajonit drejt integrimit në BE”, shkruan Rama në një reagim publik.
Sipas agjendës zyrtare, në orën 14:30 do të zhvillohet pritja e delegacioneve nga presidenti Begaj, pas së cilës ai do të mbajë fjalën hapëse. Gjatë qëndrimit të tyre në Tiranë, liderët do të zhvillojnë edhe takime bilaterale për të thelluar më tej marrëdhëniet mes vendeve pjesëmarrëse.
Në përfundim të samitit, Shqipëria do t’i dorëzojë presidencën Bullgarisë. Presidenti Begaj do t’i kalojë stafetën homologut bullgar Rumen Radev, në një ceremoni zyrtare. Po ashtu, në mbyllje do të mbahet një deklaratë për shtyp nga Presidenti Begaj, presidentja e Maqedonisë së Veriut, Gordana Siljanovska-Davkova, dhe Presidenti i Bullgarisë, Rumen Radev.
Gjatë presidencës së saj për periudhën qershor 2024 – qershor 2025, Shqipëria ka kontribuar në fuqizimin e bashkëpunimit rajonal, duke mbështetur zbatimin e objektivave të Tregut të Përbashkët Rajonal dhe duke përshpejtuar procesin e afrimit të rajonit me Bashkimin Evropian.
SEECP përfshin 13 vende anëtare: Shqipërinë, Bosnje-Hercegovinën, Bullgarinë, Kroacinë, Greqinë, Maqedoninë e Veriut, Moldavinë, Malin e Zi, Rumaninë, Serbinë, Slloveninë, Kosovën dhe Turqinë. Të gjitha këto vende janë gjithashtu anëtare të Bordit të Këshillit të Bashkëpunimit Rajonal (RCC), që mbështet zbatimin e vendimeve dhe projekteve të SEECP-së.
I nisur në vitin 1996 në Sofje dhe me samitin e parë të zhvilluar në Kretë në vitin 1997, Procesi i Bashkëpunimit të Evropës Juglindore synon forcimin e marrëdhënieve të fqinjësisë së mirë dhe transformimin e rajonit në një zonë paqeje, stabiliteti dhe zhvillimi.
