Zyra Kombëtare e Auditimit (ZKA) ka publikuar raportin për vitin 2024 mbi Ministrinë e Mbrojtjes, në të cilin ka evidentuar një sërë mangësish në menaxhimin financiar dhe administrativ të këtij dikasteri, përfshirë kompensimin jo të plotë për pjesëtarët e Forcës së Sigurisë së Kosovës (FSK), keqmenaxhimin e kontratave, si dhe shkelje të afateve ligjore për mbajtjen e pozitave me ushtrues detyre.
Sipas raportit të ZKA-së, Ministria e Mbrojtjes nuk ka arritur të kompensojë në mënyrë të plotë punën jashtë orarit të pjesëtarëve të FSK-së. Në shumicën e rasteve, kompensimi është bërë përmes ditëve të pushimit, ndonëse edhe kjo nuk është zbatuar tërësisht. Auditorët paralajmërojnë se kjo qasje jo vetëm që ndikon negativisht në motivimin e pjesëtarëve të FSK-së, por mund ta ekspozojë Ministrinë ndaj padive gjyqësore në të ardhmen.
“Ministria në fund të vitit ka filluar të paguaj punën jashtë orarit të pjesëtarëve të FSK-së duke i kompensuar për periudhën janar – maj 2024. Megjithatë, pjesën më të madhe të vitit, për shkak të mungesës së buxhetit, ka zbatuar kompensimin me ditë pushimi, të cilat gjithashtu nuk janë realizuar plotësisht”, thuhet në raportin e publikuar.
Raporti gjithashtu vë në pah se Ministria e Mbrojtjes ka shpenzuar 97% të buxhetit të saj për vitin 2024 – mbi 169 mijë euro – me problemet më të mëdha të evidentuara në menaxhimin e kontratave dhe barnave mjekësore.
Në aspektin administrativ, ZKA ka identifikuar raste ku pozitat janë mbajtur me ushtrues detyre përtej afatit ligjor. Konkretisht, në dy raste, personat kanë ushtruar detyrën që nga tetori i vitit 2020 deri në mars të vitit 2025, duke shkelur rregulloret ligjore për emërimet në pozita publike. Sipas auditorëve, komisionet e rekrutimit nuk kanë treguar kujdes të mjaftueshëm në trajtimin e aplikimeve dhe dokumentacionit të nevojshëm.
Mangësi janë identifikuar edhe në sektorin e mallrave dhe shërbimeve, ku veçanërisht theksohet keqmenaxhimi i barnave mjekësore. Sipas ZKA-së, menaxhimi i barnave nuk është bërë përmes sistemit elektronik “e-pasuria”, por në mënyrë fizike, duke krijuar pasaktësi në të dhënat për stokun real. Për më tepër, barnat e skaduara janë ruajtur për vite me radhë në ambiente të papërshtatshme në regjimentin e mjekësisë, ndonëse gjatë auditimit janë ndërmarrë hapa për zhvendosjen e tyre në kushte më të përshtatshme.
Raporti për vitin 2023 kishte rezultuar me pesë rekomandime për Ministrinë e Mbrojtjes, por vetëm dy prej tyre janë zbatuar plotësisht, një është përsëritur dhe dy të tjera janë zbatuar pjesërisht, konstaton ZKA.
Zyra Kombëtare e Auditimit i bën thirrje Ministrisë që të adresojë seriozisht këto gjetje dhe të ndërmarrë masa konkrete për përmirësimin e qeverisjes financiare dhe administrative, në mënyrë që të shmangen shkeljet e përsëritura dhe të rritet efikasiteti institucional.
