Janë zbuluar detaje të reja lidhur me sulmin e armatosur që ndodhi gjatë Darkës së Korrespondentëve të Shtëpia e Bardhë, ku ishte i pranishëm edhe Presidenti amerikan Donald Trump.
Sipas mediave amerikane, i dyshuari është identifikuar si Cole Tomas Allen, 31 vjeç, nga Torrance, në California.
Raportohet se Allen kishte punuar si mësues pas përfundimit të studimeve në California Institute of Technology, një nga universitetet më prestigjioze në SHBA.
Sipas policisë, ai ishte i ftuar në hotelin Washington Hilton, ku po zhvillohej eventi, dhe kishte me vete disa armë, përfshirë pistoleta dhe thika.
Autori u neutralizua nga agjentët e sigurisë në vendngjarje dhe më pas u arrestua. Pamjet e publikuara nga mediat tregojnë momentin kur ai ndodhet i shtrirë në tokë, i prangosur nga forcat e rendit.
Aktualisht, Allen po merr trajtim mjekësor në spital dhe pritet të përballet me akuza zyrtare ditën e hënë.
Sipas CNN, niveli i sigurisë në këtë event ishte jashtëzakonisht i lartë, i krahasueshëm me takimet e rëndësisë së sigurisë kombëtare, çka ka ngritur pikëpyetje të forta mbi mënyrën se si i dyshuari arriti të afrohej me armë në një zonë kaq të mbrojtur.
Ngjarja ka tronditur opinionin publik në SHBA dhe ka rikthyer debatin mbi sigurinë në eventet e nivelit të lartë.
