Tensionet mes Shtetet e Bashkuara dhe Iranit vijojnë të mbeten të larta, ndërsa përpjekjet për një marrëveshje përfundimtare armëpushimi janë futur në një fazë të pasigurt.
Presidenti amerikan Donald Trump ka vendosur të anulojë në moment të fundit udhëtimin e dy emisarëve të tij kryesorë, Jared Kushner dhe Steve Witkoff, të cilët pritej të udhëtonin drejt Islamabad për të vijuar negociatat me palën iraniane.
Ky vendim vjen në një klimë mosbesimi të thellë mes palëve, që vazhdon të pengojë dialogun e drejtpërdrejtë. Delegacionet ende refuzojnë të ulen në të njëjtën tryezë, duke preferuar komunikimin përmes ndërmjetësve.
Nga ana iraniane, negociatat udhëhiqen nga ministri i Jashtëm Abbas Araghchi, i cili ka theksuar se aktualisht nuk ka mandat për të diskutuar çështjet bërthamore — një nga pikat më të ndjeshme të konfliktit.
Sipas burimeve, Araghchi udhëtoi në Pakistan kryesisht për të paraqitur qëndrimet e Teheranit mbi armëpushimin e përkohshëm dhe për të kërkuar një ndalim të plotë të luftimeve, duke sjellë edhe një propozim të ri për palën amerikane.
Megjithatë, Donald Trump e ka cilësuar ofertën iraniane si të pamjaftueshme, duke deklaruar:
“Nëse iranianët e duan marrëveshjen, le të na telefonojnë.”
Sipas tij, vetëm pak minuta pas anulimit të udhëtimit, pala iraniane paraqiti një propozim më të avancuar, por që ende nuk i plotësonte pritshmëritë e Uashingtonit.
Ndërkohë, nga brenda Iranit, burime pranë regjimit theksojnë se vendimmarrja mbetet e ndikuar nga struktura e fuqisë që përfshin udhëheqjen fetare, politike dhe atë ushtarake, duke reflektuar kompleksitetin e procesit negociues.
Pavarësisht disa sinjaleve për përparim, marrëveshja përfundimtare mbetet ende “në ajër”, ndërsa konflikti dhe tensionet gjeopolitike vazhdojnë të rëndojnë situatën ndërkombëtare.
