Ndërmarrja publike “Termokos” ka njoftuar se sezoni ngrohës 2026/2027 do të nisë zyrtarisht më 15 tetor. Furnizimi me ngrohje do të fillojë me kapacitet të kufizuar dhe do të rritet gradualisht, deri në stabilizimin e plotë të sistemit për mbi 25 mijë konsumatorë të kyçur në rrjetin e kryeqytetit.
Ndërmarrja Publike “Termokos” ka bërë të ditur se janë përmbushur kushtet e nevojshme për fillimin e sezonit të ri të ngrohjes 2026/2027.
Sipas njoftimit të ndërmarrjes, vendimi është marrë pas vlerësimit të përgatitjeve nga kryeshefi ekzekutiv, Bersant Beka, në bashkëpunim me menaxhmentin e Termokosit.
Fillimi i sezonit më 15 tetor është përcaktuar në përputhje me legjislacionin në fuqi dhe kushtet klimatike.
Furnizimi do të rritet gradualisht
Termokosi ka njoftuar se furnizimi me ngrohje nuk do të nisë menjëherë me kapacitet të plotë. Për të garantuar sigurinë e pajisjeve dhe funksionimin e qëndrueshëm të sistemit, ngrohja do të lëshohet fillimisht me kapacitet të kufizuar.
Kapaciteti do të rritet gradualisht, deri në stabilizimin e plotë të furnizimit për të gjithë konsumatorët e kyçur në rrjet.
Sipas ndërmarrjes, gjatë ditëve të fundit janë përfunduar përgatitjet teknike dhe organizative për fillimin e sezonit të ri ngrohës.
Nënshkruhet marrëveshja për furnizim me energji me KEK-un
Në kuadër të përgatitjeve, Termokosi ka nënshkruar edhe marrëveshjen për furnizim me energji me Korporatën Energjetike të Kosovës (KEK).
Ndërmarrja ka bërë të ditur se përgatitjet janë realizuar në koordinim me Komunën e Prishtinës dhe organet drejtuese të saj.
Sezoni ngrohës 2026/2027 pritet t’u sigurojë ngrohje mbi 25 mijë konsumatorëve të lidhur në rrjetin e Termokosit në kryeqytet.