Tri familje në Kosovë kanë marrë sot konfirmimin për fatin e familjarëve të tyre, të zhdukur me dhunë që nga viti 1999.
Këtë e ka bërë të ditur Albulena Haxhiu, e cila ka njoftuar se analizat e ADN-së kanë konfirmuar identitetin e tri viktimave, mbetjet mortore të të cilave janë zhvarrosur në varrezat masive në Kalludër dhe Jabukë të Zubin Potokut.
Sipas Haxhiut, viktimat ishin pjesë e grupit të njohur si “Grupi i Intelektualëve”, shqiptarë nga Skenderaj dhe Mitrovica, të cilët, sipas saj, ishin rrëmbyer nga forcat serbe më 19 prill 1999.
“Për 27 vjet, këto familje jetuan pa ditur ku ishin më të dashurit e tyre. Sot ato e dinë. Dhimbja mbetet, por kjo pritje e gjatë mbaroi”, ka shkruar Haxhiu.
Ajo ka shprehur solidaritet me familjet që kanë marrë konfirmimin për të afërmit e tyre, si dhe me familjet e tjera që ende presin rezultatet e gërmimeve.
Haxhiu ka deklaruar se procesi i kërkimit do të vazhdojë deri në gjetjen e personit të fundit të zhdukur me dhunë dhe që përgjegjësit, sipas saj, të dalin para drejtësisë.
