Kryetari i PDK-së, Bedri Hamza, ka vizituar sot familjet e Hashim Thaçit, Kadri Veselit dhe Jakup Krasniqit, pas vendimit të Gjykatës Speciale në Hagë.
Hamza ka thënë se gjatë vizitave u ka shprehur familjeve mbështetjen e tij, duke e cilësuar vendimin e Hagës si “të rëndë, të padrejtë dhe të pabazuar”.
“Sot isha për vizitë në familjet Thaçi, Veseli dhe Krasniqi, pas vendimit të rëndë, të padrejtë dhe të pabazuar në Hagë. I sigurova se nuk janë vetëm dhe se nuk do të jenë kurrë”, ka shkruar Hamza.
Ai ka deklaruar se dhimbjen e familjeve e konsideron si dhimbje të përbashkët dhe ka shprehur krenari për figurat e ish-krerëve të UÇK-së dhe luftën për liri.
“Dhimbja e tyre është dhimbja jonë. Mërzia e tyre është mërzia e popullit tonë”, ka shkruar ai.
Hamza ka thënë se do të vazhdojë angazhimi i përbashkët për atë që ai e cilëson si betejë për drejtësi dhe liri, deri në kthimin në Kosovë të “luftëtarit të fundit të lirisë”.
“Dje, sot dhe përjetësisht, çlirimtarë!”, ka përfunduar Hamza.
