Presidenti i Shteteve të Bashkuara, Donald Trump, ka falënderuar Shqipërinë dhe Kosovën për angazhimin e tyre në kuadër të përpjekjeve ndërkombëtare për stabilizimin e Gazës.
Në fjalimin e tij në sesionin e 81-të të Asamblesë së Përgjithshme të Kombeve të Bashkuara në New York, Trump përmendi vendet që, sipas tij, janë angazhuar të kontribuojnë me trupa, forca policore dhe trajnime për misionin e stabilizimit në Gaza.
Në mesin e vendeve të përmendura ishin Shqipëria dhe Kosova, së bashku me Indonezinë, Marokun, Kazakistanin, Egjiptin dhe Jordaninë.
“Dua gjithashtu të falënderoj vendet që janë angazhuar të dërgojnë trupa, forca policie dhe të ofrojnë trajnime për të ndihmuar në stabilizimin e Gazës, përfshirë Indonezinë, Marokun, Shqipërinë, Kosovën, Kazakistanin, Egjiptin, Jordaninë dhe të tjera”, tha Trump.
Angazhimi i Shqipërisë dhe Kosovës lidhet me Forcën Ndërkombëtare të Stabilizimit në Gaza (ISF), e paraparë në kuadër të planit të administratës amerikane për pasluftën në Gaza. Në shkurt, Trump kishte deklaruar se Shqipëria, Kosova dhe Kazakistani kishin marrë përsipër të kontribuonin me trupa dhe personel policor për stabilizimin e territorit.
Kosova ndërkohë ka formalizuar pjesëmarrjen e saj në këtë mision. Më 7 shtator 2026, Prishtina nënshkroi marrëveshjen e pjesëmarrjes me Forcën Ndërkombëtare të Stabilizimit dhe Bordin e Paqes, duke u bërë pjesë e mekanizmit të planifikuar për sigurinë dhe stabilizimin e Gazës.
Edhe Shqipëria është ndër vendet që kanë marrë përsipër të kontribuojnë me personel në këtë forcë ndërkombëtare. Sipas të dhënave të publikuara më herët, pesë vendet e para që u angazhuan për të kontribuar me trupa ishin Indonezia, Maroku, Kazakistani, Kosova dhe Shqipëria.
Misioni synon të mbështesë sigurinë në Gaza, tranzicionin drejt një administrate civile dhe krijimin e kushteve për rindërtim. Sipas planit të paraqitur nga drejtuesit e forcës, objektivi afatgjatë është një strukturë me rreth 20 mijë trupa dhe 12 mijë pjesëtarë të policisë.
Për Shqipërinë dhe Kosovën, përmendja nga Trump në fjalimin e tij në OKB vjen pas angazhimeve të tyre konkrete në kuadër të këtij mekanizmi ndërkombëtar për Gazën.