Presidenti i Donald Trump ka konfirmuar se Shtetet e Bashkuara të Amerikës kanë nisur një fushatë ushtarake kundër Iranit, sipas një videoje të publikuar në rrjetet sociale.
Në mesazhin rreth tetëminutësh, Trump deklaroi se qëllimi i operacionit është mbrojtja e qytetarëve amerikanë dhe neutralizimi i kërcënimeve që, sipas tij, vijnë nga regjimi iranian.
“Objektivi ynë është të mbrojmë popullin amerikan duke eliminuar kërcënimet e menjëhershme nga regjimi iranian, një grup i pamëshirshëm, shumë i ashpër dhe i rrezikshëm,” tha ai.
Sipas presidentit amerikan, aktivitetet e Iranit paraqesin rrezik të drejtpërdrejtë për interesat e SHBA-së në botë, përfshirë trupat amerikane, bazat ushtarake jashtë vendit dhe aleatët ndërkombëtarë.
Trump theksoi gjithashtu se marrëdhëniet mes SHBA-së dhe Iranit kanë qenë të tensionuara për dekada.
“Për 47 vjet, regjimi iranian ka brohoritur ‘Vdekje Amerikës’ dhe ka zhvilluar një fushatë të pandërprerë gjakderdhjeje dhe vrasjesh masive, duke synuar Shtetet e Bashkuara, trupat tona dhe njerëz të pafajshëm në shumë e shumë vende,” u shpreh ai.
Deklarata e tij vjen në një moment të tensioneve të rritura në Lindjen e Mesme dhe pritet të ketë reagime të shumta ndërkombëtare lidhur me përshkallëzimin e situatës mes SHBA-së dhe Iranit.
