Presidenti amerikan Donald Trump ka shkaktuar reagime pas paraqitjes së tij në Darkën e Korrespondentëve të Shtëpisë së Bardhë me një kapelë të kuqe me mbishkrimin “Trump 2028”, duke lënë të kuptohet se ai synon një tjetër kandidim për Shtëpinë e Bardhë.
Gjatë fjalimit të tij në këtë aktivitet tradicional në Uashington, Trump deklaroi se një mandat i tretë presidencial është një nga synimet e tij.
“Ky është qëllimi im. Një mandat i tretë si president i Shteteve të Bashkuara. Do ta bëjmë”, u shpreh Trump para të pranishmëve.
Ai shtoi se beson se një rikandidim i ardhshëm do të ishte i realizueshëm, duke thënë: “Do ta bëj. Duhet të jetë e lehtë”.
Trump pretendoi gjithashtu se ka arritur fitore të shumta politike, duke deklaruar: “Kam fituar. Kam fituar tri herë. Tani do ta bëj sërish”.
Debat mbi mundësinë e një mandati të tretë
Deklaratat e Trump kanë hapur sërish debatin mbi mundësinë ligjore të një kandidimi të tretë, pasi Kushtetuta e Shteteve të Bashkuara, përmes Amendamentit të 22-të, kufizon presidentët në dy mandate.
Trump, megjithatë, ka vazhduar të lërë të hapur këtë ide, ndërsa mbështetësit e tij kanë promovuar më herët sloganin “Trump 2028”.
Kritika ndaj mediave dhe kundërshtarëve politikë
Në fjalimin e tij, Trump riktheu kritikat ndaj mediave, duke sulmuar atë që ai i cilëson si “media të lajmeve të rreme”.
Ai ironizoi gazetarë dhe figura publike, ndërsa përmendi edhe disa kundërshtarë politikë. “Këtu ndodhet grupi më i madh i njerëzve me sindromën e çmendurisë kundër Trump-it që është mbledhur ndonjëherë në të njëjtin vend”, tha ai.
Kjo ishte hera e parë që Trump mori pjesë në Darkën e Korrespondentëve të Shtëpisë së Bardhë gjatë një mandati presidencial, pasi gjatë mandatit të tij të parë ai e kishte bojkotuar këtë aktivitet.
Darka u zhvillua nën masa të rrepta sigurie
Ceremonia e këtij viti u zhvillua në hotelin Waldorf Astoria, pasi ishte shtyrë më herët për shkak të një incidenti sigurie.
Në hapje të mbrëmjes, presidentja në largim e Shoqatës së Korrespondentëve të Shtëpisë së Bardhë, Weijia Jiang nga CBS News, theksoi rëndësinë e lirisë së shtypit dhe deklaroi se komuniteti i gazetarëve “nuk do të frikësohet” nga dhuna politike.
Trump dënoi gjithashtu dhunën politike, duke thënë se “asnjë person i armatosur dhe i çrregulluar nuk do ta ndryshojë këtë”.
Darka e Korrespondentëve të Shtëpisë së Bardhë është një traditë më shumë se 100-vjeçare në Uashington, e cila mbledh gazetarë, politikanë dhe figura publike, duke promovuar gazetarinë dhe lirinë e medias.
