Një deklaratë e presidentit amerikan Donald Trump ka shkaktuar reagime të forta ndërkombëtare, pasi ai tha se po shqyrton seriozisht mundësinë që Venezuela të bëhet shteti i 51-të i Shteteve të Bashkuara të Amerikës.
Deklarata e Trump erdhi gjatë një interviste për mediat amerikane, duke nxitur reagim të menjëhershëm nga presidentja në detyrë e Venezuelës, Delcy Rodríguez, e cila e refuzoi kategorikisht një ide të tillë.
“Ne do të vazhdojmë të mbrojmë integritetin tonë, sovranitetin, pavarësinë dhe historinë tonë. Venezuela nuk është koloni, por një vend i lirë”, deklaroi Rodríguez nga Haga, ku po zhvillohen seanca lidhur me mosmarrëveshjen territoriale mes Venezuelës dhe Guajanës.
Komentet e Trump vijnë në një moment tensioni diplomatik, ndërsa Venezuela mbetet e përfshirë në konfliktin për rajonin e pasur me naftë Essequibo, territor që përbën rreth dy të tretat e Guajanës dhe që të dyja palët e pretendojnë si të tyren.
Sipas raportimeve, zyrtarë venezuelianë dhe amerikanë kanë mbajtur kontakte për çështje bashkëpunimi, por deklarata për “shtetin e 51-të” pritet të komplikojë më tej raportet politike.
Rajoni i Essequibo konsiderohet strategjik për shkak të rezervave të mëdha të naftës, arit dhe mineraleve, ndërsa vendimi final i Gjykatës Ndërkombëtare të Drejtësisë për këtë çështje mund të marrë muaj.
Deklarata e Trump po shihet nga analistët si një tjetër provokim diplomatik me potencial për të ndezur tensione të reja në Amerikën Latine.