Koalicioni VLEN pritet të marrë edhe dy pozita të zëvendësministrave, në dikasteret e Shëndetësisë dhe të Politikës Sociale, pas bisedimeve dhe marrëveshjes së arritur me kryeministrin e Maqedonisë së Veriut, Hristijan Mickoski.
Burime nga koalicioni bëjnë të ditur se propozimet konkrete dhe emrat e kandidatëve tashmë i janë dorëzuar kryeministrit për konfirmim përfundimtar.
Ndryshimet në eshalonin e dytë qeveritar vijnë si rezultat i riorganizimit të kabinetit në muajin korrik, gjatë të cilit VLEN mbeti pa drejtimin e Ministrisë së Shëndetësisë dhe asaj të Politikës Sociale.
Argumenti kryesor i koalicionit është ruajtja e balancës politike ndërmjet partnerëve të pushtetit.
Megjithatë, për të marrë dy pozitat e reja pa ndryshuar peshën e përgjithshme të përfaqësimit në Qeveri, VLEN pritet të heqë dorë nga dy poste të tjera të zëvendësministrave.
Njëra prej pozitave që pritet të lirohet është ajo e zëvendësministrit në Ministrinë e Bujqësisë, ku ministri është nga radhët e lëvizjes ZNAM. Ky post pritet t’i kalojë VMRO-DPMNE-së.
Po ashtu, pritet të lirohet edhe pozita e zëvendësministrit të Kulturës. Kjo pozitë mund t’i kalojë VMRO-DPMNE-së ose lëvizjes ZNAM, pasi ministri aktual i Kulturës është nga radhët e VLEN-it.
Përveç këtyre ndryshimeve, VLEN pritet të marrë edhe një tjetër pozitë të zëvendësministrit, krahas posteve që tashmë i ka në Energjetikë dhe Transformim Digjital.
Kryeministri Hristijan Mickoski ka paralajmëruar se kompletimi dhe rokadat në eshalonin e dytë të Qeverisë pritet të përmbyllen gjatë gjysmës së dytë të tetorit.
