Presidenti i Serbisë, Aleksandar Vučić, ka bërë një deklaratë surprizuese gjatë një tubimi të Partisë Progresive Serbe (SNS) në Beograd, duke njoftuar se do të largohet nga posti i presidentit brenda pak javësh.
“Kjo është ndoshta hera e fundit që po ju drejtohem si President i Republikës. I kam shërbyer vendit tim me besnikëri për 14 vjet. Do të jem president edhe për disa javë, pastaj do të jap dorëheqjen”, deklaroi Vuçiç para mbështetësve të tij.
Ai tha se gjatë gjithë karrierës së tij politike ka punuar vetëm për interesat e qytetarëve serbë dhe theksoi se e do Serbinë më shumë se çdo gjë tjetër.
Vuçiç njoftoi gjithashtu se lista për zgjedhjet e ardhshme parlamentare do të mbajë emrin “Serbia e Bashkuar”, duke lënë të kuptohet se do të mbetet aktiv politikisht edhe pas dorëheqjes nga presidenca.
Gjatë fjalimit, presidenti serb sulmoi ashpër opozitën dhe kritikët e tij, duke i akuzuar për tentativa për destabilizimin e vendit. Sipas tij, gjatë një viti e gjysmë të fundit janë bërë përpjekje për ta dobësuar Serbinë nga brenda dhe nga jashtë.
Ai komentoi edhe protestat studentore, duke pretenduar se studentët janë përdorur si “vegla në duart e politikanëve”.
“Studentët fillimisht ishin lodër në duart e politikanëve, pastaj në duart e të tjerëve. I kam ftuar vazhdimisht për dialog, por nuk deshën të bisedojnë me presidentin e tyre”, u shpreh ai.
Vuçiç pranoi gjithashtu se qeverisja e tij ka bërë gabime, sidomos në emërimin e disa zyrtarëve që, sipas tij, nuk e meritonin besimin e qytetarëve.
“Kemi bërë shumë gabime. Disa njerëz që emëruam nuk e meritonin besimin tuaj. Ata menduan për veten, jo për popullin”, tha ai.
Sa i përket çështjes së Kosovës, Vuçiç ritheksoi qëndrimin tradicional të Beogradit, duke deklaruar se Serbia është e gatshme për dialog, por jo për negociata rreth sovranitetit territorial.
“Mund të flasim për gjithçka, por jo për territorin e kujt është Kosova. Kushtetuta jonë është e qartë dhe ne do t’i përmbahemi asaj”, deklaroi presidenti serb.
Çfarë ndodh pas dorëheqjes?
Sipas ligjit serb, dorëheqja e presidentit hyn në fuqi sapo dokumenti me shkrim dorëzohet në Kuvend. Pas kësaj, detyrën e presidentit e merr përkohësisht kryetari i Kuvendit për një periudhë maksimale prej tre muajsh, deri në organizimin e zgjedhjeve të jashtëzakonshme presidenciale.
Ligji parasheh që zgjedhjet presidenciale të shpallen brenda afateve kushtetuese, ndërsa votimi duhet të mbahet jo më vonë se tre muaj pas dorëheqjes zyrtare.
Deklarata e Vuçiçit ka shkaktuar reagime të forta në skenën politike serbe, pasi mbetet e paqartë nëse bëhet fjalë për një largim real nga pushteti apo për një lëvizje strategjike para zgjedhjeve të ardhshme.