Policia e Kosovës, Prokuroria Speciale dhe Instituti i Mjekësisë Ligjore kanë konfirmuar një gjetje të re gjatë gërmimeve dhe ekshumimeve në një lokacion të dyshuar në Zubin Potok.
Gjatë veprimeve të gërmimit dhe ekshumimit në rastin e Zubin Potokut, ekipet e Institutit të Mjekësisë Ligjore kanë gjetur mbetje kockore, të cilat, sipas vlerësimit preliminar, dyshohet se u përkasin së paku 23 individëve.
Gjetja është konfirmuar të mërkurën nga mjeko-ligjorët, ndërsa identifikimi i plotë i mbetjeve do të bëhet pas përfundimit të ekzaminimeve mjeko-ligjore dhe procedurave përkatëse.
Rasti po hetohet nga Prokuroria Speciale e Republikës së Kosovës, në bashkëpunim me Policinë e Kosovës dhe Institutin e Mjekësisë Ligjore. Hetimet po zhvillohen përmes Drejtorisë për Hetimin e Krimeve të Luftës dhe në koordinim me institucionet e tjera kompetente.
Tre persona në paraburgim
Në kuadër të këtij rasti, aktualisht po hetohen tre persona me inicialet J.R., M.J. dhe M.B., nën dyshimin për kryerjen e veprës penale “Krime lufte kundër popullsisë civile”.
Të tre personat ndodhen në masën e paraburgimit.
Institucionet kanë bërë të ditur se veprimet hetimore dhe procedurale do të vazhdojnë, ndërsa procesi i identifikimit të mbetjeve do të kryhet përmes ekzaminimeve mjeko-ligjore.
Policia, Prokuroria Speciale dhe Instituti i Mjekësisë Ligjore kanë theksuar se procesi do të zhvillohet në mënyrë profesionale, të paanshme dhe të dokumentuar, duke respektuar dinjitetin e viktimave dhe familjeve të personave të zhdukur.
Institucionet kanë paralajmëruar se çdo zhvillim i ri lidhur me rastin do të bëhet publik në përputhje me kërkesat ligjore dhe interesin e hetimit.
