Presidenti ukrainas, Volodymyr Zelensky, ka paralajmëruar se Rusia mund t’i intensifikojë sulmet ndaj Ukrainës në prag të zgjedhjeve afatmesme në Shtetet e Bashkuara, të cilat sipas raportimit mbahen më 3 nëntor. Sipas tij, Moska po synon të ushtrojë presion ndaj Ukrainës dhe Uashingtonit përmes goditjeve të vazhdueshme, veçanërisht ndaj kryeqytetit Kiev.
Në një intervistë për një gazetë spanjolle, Zelensky deklaroi se Rusia po përpiqet të demonstrojë forcën e saj në prag të zgjedhjeve amerikane dhe se pret një përshkallëzim të mëtejshëm të sulmeve gjatë kësaj periudhe.
Sipas presidentit ukrainas, Kievi është përballur javët e fundit me sulme të vazhdueshme, si gjatë ditës, ashtu edhe gjatë natës. Ai pretendoi se kryeqyteti është goditur me 300 deri në 500 sulme në ditë, duke theksuar se objektivat ruse nuk kufizohen vetëm te infrastruktura ushtarake.
“Rusët duan që ukrainasit, veçanërisht banorët e kryeqytetit, të largohen nga qyteti”, deklaroi Zelensky. Sipas tij, një nga synimet e Moskës është të krijojë përshtypjen se Ukraina nuk mund të funksionojë dhe të ekzistojë pa Kievin.
Megjithatë, ai theksoi se Ukraina është shumë më tepër se kryeqyteti i saj dhe se Kievi vazhdon të qëndrojë përballë sulmeve.
Zelensky akuzoi gjithashtu Rusinë se po synon të paralizojë jetën e përditshme të qytetarëve, duke goditur shkollat, kopshtet, banesat, logjistikën dhe furnizimet me ushqime e medikamente.
Sipas tij, përmes këtyre sulmeve Moska synon të krijojë kushte kaotike, në mënyrë që qytetarët të mos mund të shkojnë në punë dhe fëmijët të mos mund të ndjekin mësimin.
Presidenti ukrainas tha se mesazhet e Moskës i drejtohen kryesisht Uashingtonit, pasi, sipas vlerësimit të tij, Vladimir Putin beson se intensifikimi i sulmeve mund të ndikojë në perceptimin amerikan për fuqinë ushtarake ruse.
Ai bëri të ditur se për këtë rrezik kishte paralajmëruar edhe përfaqësuesit e ekipit negociator të Donald Trump, gjatë vizitës së tyre në Kiev më 6 shtator. Sipas Zelenskyt, ai u kishte thënë se Ukraina mund të përballej me sulme masive, të cilat do të godisnin drejtpërdrejt edhe popullsinë civile.
