Vetëm një ditë para finales së madhe të Botërorit 2026 ndaj Argjentinës, kombëtarja e Spanjës është përballur me një pengesë të papritur. Stërvitja e fundit e planifikuar në New Jersey është anuluar për shkak të kushteve të pafavorshme atmosferike.
Shiu i dendur dhe aktiviteti i lartë i vetëtimave detyruan autoritetet të zbatojnë protokollet e sigurisë në fuqi në shtetin e New Jersey-t, të cilat kërkojnë ndërprerjen e çdo aktiviteti sportiv për të paktën 30 minuta pas rrufesë së fundit. Për shkak të vazhdimit të motit të keq, seanca stërvitore u anulua plotësisht.
Në vend të punës në fushë, skuadra e drejtuar nga Luis de la Fuente zhvilloi përgatitjet në palestër.
Pavarësisht këtij ndryshimi të detyruar në program, nuk ka shqetësime për gjendjen fizike të futbollistëve. Në konferencën për shtyp para finales, De la Fuente konfirmoi se të gjithë lojtarët janë në dispozicion dhe të gatshëm për sfidën, ndërsa Lamine Yamal dhe Pedro Porro janë rikuperuar plotësisht.
Nëse nuk do të ketë ndonjë zhvillim të papritur, Spanja pritet të zbresë në fushë me të njëjtin formacion që eliminoi Belgjikën në çerekfinale dhe Francën në gjysmëfinale.
Finalja e shumëpritur mes Argjentinës dhe Spanjës do të zhvillohet të dielën, duke nisur nga ora 21:00, në stadiumin MetLife në New Jersey, ku do të shpallet kampioni i ri i Botërorit 2026.