Ambasada e Republikës së Kosovës në Kroaci ka ndërmarrë një aksion mbështetës për bashkatdhetarët që po udhëtojnë drejt Kosovës gjatë sezonit veror, duke shpërndarë ujë dhe pako ushqimore në Pikën Kufitare Bajakovo.
Sipas njoftimit të Ambasadës, stafi diplomatik ishte i pranishëm në terren për t’u ofruar ndihmë udhëtarëve, në një kohë kur fluksi në kufi mbetet i lartë.
Edhe pse kolonat e automjeteve janë të gjata, autoritetet kompetente kanë bërë të ditur se koha e pritjes për kalimin e kufirit është aktualisht rreth 10 deri në 15 minuta. Në funksion janë tetë korsi hyrëse, ndërsa autoritetet kroate po punojnë për të garantuar një qarkullim sa më të shpejtë.
Ambasada sqaron se kolonat janë kryesisht pasojë e zbatimit të Sistemit të Hyrje-Daljes (EES – Entry/Exit System), i cili ka sjellë procedura të reja të kontrollit kufitar dhe, si rrjedhojë, vonesa të përkohshme në qarkullim.
Në njoftim është shprehur edhe një falënderim i veçantë për Hakif Qenajn, i cili dhuroi pakot ushqimore të shpërndara për udhëtarët.
“Kontributi i tij përfaqëson një akt të çmuar solidariteti dhe kujdesi ndaj bashkatdhetarëve tanë”, thuhet në reagimin e Ambasadës.
Ambasada e Kosovës në Zagreb thekson se do të vazhdojë të monitorojë situatën në pikat kufitare dhe të ofrojë mbështetje për qytetarët e Kosovës sa herë që paraqitet nevoja, duke u uruar të gjithë mërgimtarëve një udhëtim të sigurt dhe të mbarë.
