Deputeti i Lëvizjes Vetëvendosje, Fitore Pacolli, ka reaguar ndaj deklaratave të deputetes së LDK-së, Hykmete Bajrami, lidhur me gjendjen në Deponinë e Sferkës në Pejë, duke e akuzuar atë për dezinformim dhe keqinterpretim të përgjegjësive institucionale.
Përmes një reagimi në rrjetet sociale, Pacolli tha se Bajrami ka gabuar kur ka pretenduar se deponia menaxhohet nga Kompania për Menaxhimin e Deponive në Kosovë (KMDK).
Sipas tij, Deponia e Sferkës menaxhohet nga Kompania Rajonale e Mbeturinave “Ambienti”, ndërsa KMDK-ja ka pasur vetëm rol këshillues për zbatimin e standardeve të trajtimit të mbeturinave.
“KMDK nuk e menaxhon Deponinë e Sferkës. Atë e menaxhojnë njerëzit e KRM ‘Ambienti'”, shkroi Pacolli.
Ai pretendon se kompania përgjegjëse nuk ka zbatuar rekomandimet për mbulimin e shtresave të mbeturinave me dhe apo materiale të tjera jo të djegshme, gjë që sipas tij ka ndikuar në përkeqësimin e situatës.
Pacolli shtoi se Inspektorati i Ministrisë së Mjedisit ka shqiptuar një gjobë prej 5 mijë eurosh ndaj KRM “Ambienti” për mosrespektim të standardeve të menaxhimit të deponisë.
Në reagimin e tij, ai kritikoi edhe LDK-në, duke e akuzuar se po tenton të shmangë përgjegjësinë politike për gjendjen në deponi.
Pacolli tha se pret që Prokuroria të zhvillojë hetime të plota për rastin dhe të përcaktojë përgjegjësit institucionalë për situatën e krijuar në Deponinë e Sferkës.
