E marta në Kosovë pritet të karakterizohet me mot të nxehtë, por edhe të paqëndrueshëm.
Gjatë mëngjesit dhe paradites pritet të mbajë mot me diell dhe mjaft i nxehtë, ndërsa gjatë pasdites atmosfera pritet të destabilizohet, me zhvillime konvektive që mund të kushtëzojnë rrebeshe lokale shiu, vetëtima dhe bubullimë.
Reshjet do të jenë të karakterit lokal dhe nuk pritet të përfshijnë të gjitha viset. Në zonat ku do të zhvillohen rrebeshet, pritet edhe freskim i përkohshëm i temperaturave.
Temperaturat do të mbeten të larta, me minimale rreth 19°C, ndërsa maksimalja pritet të arrijë deri në 34°C.
Në përgjithësi, e marta sjell vapë të fortë gjatë pjesës së parë të ditës dhe zhvillime të paqëndrueshme atmosferike gjatë pasdites.
