Kandidati i Partisë Demokratike të Kosovës (PDK), Bedri Hamza, ka kritikuar gjendjen ekonomike në vend, duke thënë se ka një mospërputhje të madhe mes rritjes së çmimeve dhe nivelit të pagave e pensioneve.
Në një deklaratë publike, Hamza tha se “çmimet janë si në Evropë, por jo edhe pagat dhe pensionet”, duke e cilësuar këtë si një padrejtësi sociale.
Ai akuzoi vendimet politike për krijimin e, siç u shpreh, një krize ekonomike dhe sociale, duke premtuar ndryshim të kursit aktual.
“Do t’i themi STOP çmimeve dhe tatimeve të larta, pagave e pensioneve të pamjaftueshme, stagnimit dhe regresit”, deklaroi Hamza.
Sipas tij, vendi duhet të hyjë në një etapë të re zhvillimi ekonomik dhe rritjeje të mirëqenies për qytetarët.
“Do të hapim një etapë të re të zhvillimit, mirëqenies dhe dinjitetit për çdo qytetar të Kosovës”, shtoi ai, duke ftuar qytetarët të mbështesin ndryshimin pas 7 qershorit.
Deklarata e tij vjen në kuadër të fushatës politike të PDK-së, ku Hamza ka theksuar vazhdimisht nevojën për reforma ekonomike dhe rritje të standardit të jetesës.
