Ministrja në detyrë e Drejtësisë, Albulena Haxhiu, ka reaguar pas dyshimeve për zbulimin e një varreze të dytë masive në komunën e Zubin-Potokut, duke e cilësuar këtë një rikujtim të rëndë të krimeve të kryera gjatë luftës në Kosovë.
Sipas Haxhiut, zbulimi i varrezave masive dëshmon se drejtësia për krimet e luftës ende nuk është vënë plotësisht në vend dhe se zbardhja e fatit të personave të zhdukur mbetet një nga prioritetet kryesore të institucioneve.
Ajo theksoi se shtrirja e sovranitetit dhe rendit kushtetues në çdo pjesë të territorit të Kosovës ka qenë parakusht për identifikimin e lokacioneve të dyshuara, zbulimin e varrezave masive dhe kthimin e mbetjeve mortore te familjet e viktimave.
Haxhiu shprehu mirënjohje për Policinë e Kosovës, ekipet profesionale, ekspertët e mjekësisë ligjore dhe të gjitha institucionet që janë të angazhuara në kërkimin dhe identifikimin e personave të zhdukur me dhunë.
“Çdo varrezë e zbuluar është një hap drejt së vërtetës, por edhe një dëshmi se plagët e luftës mbeten të hapura derisa të gjendet personi i fundit i zhdukur dhe përgjegjësit për këto krime të dalin para drejtësisë”, theksoi ajo.
Në fund, ministrja në detyrë shprehu solidaritet me familjet e viktimave, duke nënvizuar se institucionet e Kosovës mbeten të përkushtuara për zbardhjen e plotë të së vërtetës dhe nderimin me dinjitet të kujtimit të viktimave të luftës.
