John Alite ka reaguar publikisht lidhur me incidentin që përfshin Sami Lushtakun, duke e cilësuar ngjarjen si një alarm serioz për Kosovën dhe duke kërkuar mbrojtje ligjore më të fortë për veteranët e UÇK-së.
Përmes një postimi publik, ai i bëri thirrje institucioneve të Kosovës që të mbajnë përgjegjës këdo që, sipas tij, fyen, etiketon në mënyrë të rreme apo sulmon publikisht veteranët e luftës.
“Ajo që ndodhi në incidentin me Sami Lushtakun duhet të jetë një thirrje zgjimi për Kosovën”, shkroi Alite.
Ai theksoi se akuzat e pabazuara ndaj veteranëve, duke i etiketuar si tradhtarë, spiunë apo armiq të vendit, përbëjnë jo vetëm sulm personal, por edhe cenim të sakrificës së luftës çlirimtare.
“Të quash një veteran ‘spiun të Serbisë’ pa prova nuk është vetëm fyerje ndaj një personi, por ndaj të gjithë atyre që luftuan për lirinë e Kosovës”, deklaroi ai.
Sipas Alites, ekziston perceptimi se po zhvillohet një fushatë e organizuar propagandistike për të dëmtuar figurën e veteranëve dhe për të krijuar përçarje në shoqëri.
“Qoftë sot Sami Lushtaku, nesër mund të jetë dikush tjetër. Kjo nuk duhet të tolerohet”, u shpreh ai.
Në fund, ai u bëri thirrje ish-ushtarëve të UÇK-së, mbështetësve dhe qytetarëve që të qëndrojnë të bashkuar, në mënyrë paqësore, dhe të kërkojnë llogaridhënie dhe respekt institucional.
“Na duhet drejtësi, respekt dhe mbrojtje për dinjitetin e atyre që sakrifikuan gjithçka për Kosovën”, përfundoi ai. 