Kompania për Distribuimin e Energjisë Elektrike në Kosovë (KEDS) ka njoftuar se të shtunën, më 16 maj 2026, do të realizohen punime të planifikuara për mirëmbajtjen dhe sigurinë e sistemit energjetik, çka do të shkaktojë ndërprerje të përkohshme të energjisë elektrike në disa rajone të vendit.
Sipas njoftimit, ndërprerjet do të prekin zona të ndryshme në Prishtinë, Prizren, Ferizaj dhe Gjakovë, ndërsa punimet lidhen me mirëmbajtje preventive të nënstacioneve, energjizim të kabllove të reja dhe projekte investive në rrjetin elektrik.
Rajoni i Prishtinës pritet të jetë më i prekuri, ku nga ora 09:30 deri në 15:30 do të ketë ndërprerje në disa lagje të kryeqytetit, përfshirë Lagjen e Muhaxherëve, Veternikun, Çagllavicën, Lagjen e Spitalit, Pallatin e Drejtësisë, Muharrem Fejzën, Hajvalinë dhe zonën përreth Grand Store. Po ashtu, në disa pjesë të Kodrës së Trimave dhe Qendrës së Panaireve ndërprerjet do të zgjasin deri në orët e pasdites.
Në Prizren, një ndërprerje më e madhe është paralajmëruar nga ora 09:00 deri në 15:00, duke përfshirë Zhurin, Dragashin dhe dhjetëra fshatra të rajonit, për shkak të energjizimit të kabllove të reja 35 kV.
Edhe Ferizaj do të përballet me ndërprerje në disa zona biznesi dhe në magjistralen Ferizaj–Prishtinë, ndërsa në Gjakovë pa energji do të mbesin disa rrugë kryesore të qytetit gjatë paradites dhe pasdites.
KEDS u ka bërë thirrje qytetarëve dhe bizneseve që të planifikojnë aktivitetet e tyre në përputhje me orarin e paralajmëruar, duke theksuar se punimet janë të domosdoshme për përmirësimin e furnizimit dhe rritjen e sigurisë së sistemit energjetik.
